Nongpoh, Nohprah 18
Ka Shnat Nongpoh jong ka Khasi Authors Society (KAS) ha ryngkat ka jingïatreilang bad ka Khasi Department jong ka Ri Bhoi College, ha ka Sngi Balang ka la pynlong ïa ka prokram kyrpang ban rakhe ïa ka lyngkhuh sngi ïap ba 84 snem jong u myllung Soso Tham lyngba ka phang pdeng kaba la ai kyrteng ‘Ka mynnor, ka mynta bad ka lashai ha ki poitri Khasi’.
Ha kane ka sngi, la wan ban ïadon ryngkat da u MLA ka Nongpoh, Bah Mayralborn Syiem kum u kongsan ha ka jingdon ryngkat jong ka Dr. Elizabeth Kharkongor, Principal ka Ri Bhoi College, ka Kong W.K Blah, Secretary ka Governing Body jong ka Ri Bhoi College, ka Kong W Nongkynrih (HoD) Khasi Department ka Ri Bhoi College, u Bah Cosmas Rynshon, President ka KAS, Shnat Nongpoh, ki ‘riewshemphang, ki samla pule lem bad kiwei kiwei.
U Bah P Kharshiïng, Finance Secretary jong ka KAS haba ai ïa ka jingkren maitphang ha kane ka sngi, u la ong ba kum ki nongthoh kot Khasi, ki dang ïai bteng ban ïakhun na ka bynta ban pynrung ïa ka ktien Khasi ha ka Khyrnit kaba Phra jong ka riti synshar ka ri bad pyntip ruh kumba long mynta, ka ktien Khasi ka dang dei tang kata ka ktien synrop lane ka ‘associate official language’ kaba ki ong ha ka ktien nongwei.
U la ong ruh ba ka ktien khlem ka thoh ka tar bad pule puthi kam lah satia ban poi sha ka thong. Dei halor kine ki nongrim kum ka seng ka ju pynlong ïa ki prokram ïamir jingmut na ka por sha ka por ban kyntiew bad pynïar ïa ka ktien Khasi khnang ba kan ïoh noh ban rung ha ka khyrnit kaba phra khnang ba kan long ka jingmyntoi kaba khraw ïa ka jaidbynriew hi baroh kawei. U Bah Mayralborn Syiem ha ka jingkren u la ong ba ka por ka la dei ban hap rung noh ha ka khyrnit kaba phra na ka bynta ka jingmyntoi jong ka jaidbynriew bad ïathuh ruh dei halor kane ka bynta ba ka Sorkar Jylla ha ka 28 tarik jong u bnai Nailur, 2018 da kawei ka sur ka la rai hapoh ïingdorbar thawaiñ ka jylla ban phah sha ka Sorkar Pdeng.
U Bah Mayralborn u la ai ruh ka jingïaroh ïa ka KAS kaba la ïakhun halor kane ka bynta bad ai mynsiem ruh ba kin nang ïai trei shitom ban pynroi ïa ka ktien Khasi khamtam kum ha kane ka juk jong kiba bun ki jingkylla ha kiba bun rukom la ka dei ha ka rukom ka riam ka beit bad kiwei kiwei de, da kaba bynrap ba ka KAS ka don ïa ka bynta kaba khraw nalor ka Khasi Hills Autonomous District Council (KHADC) ban pynneh pynsah ïa ka ktien ka thylliej, ka thoh ka tar, ka riam ka beit, ka khyndew ka shyiap bad kiwei de ki bynta kiba ïadei bad ka jaidbynriew.
