Jowai, Nohprah 18
U Bah Coming One Ymbon uba dei u Myntri ka Sorkar Jylla, u la pyntip ba u la buh bhah haduh T.3 klur na ka bynta ban tei ïa ka ïing skul bathymmai ka Govt. Senior Basic School, Mynso ha shuwa ban kut ka snem mang tyngka 2024-25.
Ïa kane u la pynbna haba kren kum u kongsan ha ka jingpynhap pyrda ïa ka jingïaid lynti ba 75 snem ka Govt. Senior Basic School, Mynso (1949-2024), ha ka 17 tarik Nohprah.
Ha kane ka sngi la ïadonlang ka Joint Director of School Education & Literacy bad In-charge DSEO West Jaiñtia Hills District Kong AP Syiem, ki nonghikai, ki kmie ki kpa, ki khynnah skul, ki nongshah khot sngewbha nalor kiwei kiwei.
Haba kren kum u kongsan, u Bah Coming u la ong ba ka dei ka kamram ka jong u ban kyntiew ïa ka skul RMSA sha ka Higher Secondary da kaba pynpaw ruh ka jingsngewdiaw halor ka jingbym ïoh jaka ban tei ïa ka hapoh ka shnong Mynso kaba la dep ban mang la 3-4 snem mynshuwa, bad u la ong ba yn ap hapoh 3-4 bnai bad lada ym ïoh jaka yn rah noh shawei.
U la kyntu ruh ïa ki trai jaka bad nongshong shnong ka Mynso ban long ki briew kiba riewspah ka mynsiem bad ïar ka jingmut jingpyrkhat bad ban don ka jingïatreilang khnang ba ka roi ka par kaba thmu ban wanrah hapoh ka shnong kan long kaba jop bad ba ki khynnah kiba wan na ki longïing ba duna ka ïoh ka kot kin lah ban pyndep ïa ka 10+2 hapoh shnong.
Ha kaba ïadei bad ki skul ha nongkyndong, u Bah Coming u la ong, bunsien ki nongshong shnong na thaiñ nongkyndong ki ju ñiew beiñ ïa ki skul ba don hapoh ki shong ki thaw, khamtam kiba biang ka ïoh ka kot kim ju kham da sngewtynnad ban phah skul ïa ki khun ha ki skul shnong bad ïa beh ban phah sha sor.
Haba kyntu ïa ki kmie ki kpa ban phah ïa ki khun ha ki skul shnong, u Bah Coming u la ong, kam don kano-kano ka jingïapher hapdeng ki skul nongkyndong bad ki skul sor.
Ha kajuh ka por u la ong, ka long kaba bakla ïa ki kmie ki kpa lada ki angnud ban phah skul ïa ki khun na ka bynta ban ïoh ïa ka kam Sorkar kaba tang shitroh, bad kyntu ruh ïa ki khynnah ban trei shitom khnang ban ïoh kheit ïa u soh jong ka jingtrei shitom.
Ha kane ka sngi u Myntri ryngkat ka Kong A.P Syiem ki la pynkup burom ïa ki nonghikai barim bad nonghikai ba mynta bad la pyllait ruh ïa ka kot sah kynmaw (souvenir) kumjuh ka jingplie ïa u maw sahnam jong ka jingdap 75 snem.
La pynphuh-pynphieng ïa kane ka sngi pynkut da ki jingrwai jingshad ba la shim bynta da ki khynnah ka skul kumjuh samla ka shnong.
