Shillong, Nohprah 18
U Lat ka Jylla Meghalaya, C.H Vijayashankar u la ai burom ïa u khraw pyrkhat jong ka thoh ka tar, u Myllung Soso Tham, uba ki jingnoh synñiang jong u ki la iehnoh ïa ki dak ki bym lah ban pyndam ha ka deiti bad ka pateng jong ka thoh ka tar ha kane ka Jylla.
Ha ka Sngi Balang ka 18 tarik Nohprah, u Lat u la don bynta lang ban kynmaw burom ïa ka lyngkhuh sngi ïap ba 84 snem jong u Myllung Soso Tham kaba la pynlong ha U Soso Tham Auditorium, State Central Library, Shillong.
“Ki kam jong u Soso Tham ha ka thoh ka tar, ki pynpaw ïa ki riti dustur, ka deiti, bad ki jingangnud jong ka jaitbynriew Khasi, ki dang ïai bteng ban ai mynsiem ïa kane ka pateng bad ïa ki pateng ban wan”, la ong u Lat.
Ka jingrakhe ïa ka sngi ïap ba 84 snem jong u Myllung Soso Tham ka la long ka por kaba kongsan ban pyrkhat ïa ki jingnoh synñiang jong u myllung bakhraw bad ban pynskhem biang ïa ka jingangnud jong ka jylla ban pynneh pynsah ïa ka jinglong kyrpang jong ka deiti.
U Lat Vijayashankar u la pynpaw ïa ka jingdonkam ban pynneh pynsah bad kyntiew ïa ka riti dustur ba riewspah jong ka jylla, da kaba pynksan ba ki kam jong u Myllung Soso Tham bad kiwei ki ‘riewkhraw ki dei ban ïai bteng ban ïalam bad pynwan dur ïa ki pateng ban wan jong ka Jylla bad ka Ri.
Ha kane ka sngi kynmaw burom ïa u Myllung Soso Tham, la don lang u Myntri ka tnat La Riti, Bah Paul Lyngdoh, Principal Secretary, Bah Frederick R Kharkongor, ki bahaïing u Myllung, ki samla pule, ki riew shemphang bad nonghikai, bad ki nongthoh kot kiba la wan ban kynmaw ïa u synñiang ba la noh da u Myllung Soso Tham.
Ha kane ka jingïalang la pynphuh-pynphieng ruh da ki jingrwai jingtem tynrai, kaba kynthup ïa ki jingshad ba la pynshong nongrim na ki poitri jong u Soso Tham, kaba pynim ïa ka pateng thoh kot jong u.
