Shillong, Nohprah 19
Ka Regional Committee pynbeit pud ka West Jaiñtia Hills ka la pynkhreh ban aiti noh ïa ka kaiphot pynbeit pud sha ka Sorkar Jylla hapoh ar bnai.
Haba pyntip ïa kane hadien ka jingïalang ha ka Sngi Palei, u Chairman ka Committee uba dei u Symbud Myntri Rangbah ka Jylla, Bah Sniawbhalang Dhar u la ong ba u la bthah ïa ki bor District ba kin pynkhreh ïa ka kaiphot kiba la pan por ban pyndep hapoh ka shi bnai lane ar bnai.
“Shisien ba la dep pynkhreh ïa ka kaiphot, ngin sa aiti noh sha ka Sorkar Jylla, ka ban sa pule ïa ka shwa ban ïakynduh bad ki bor ka Sorkar Assam”, u la ong.
Halor ka jingdawa pynphai biang ïa ki 36 tylli ki shnong ka Block-I sha Meghalaya, u Bah Dhar u la ong ba ka dei ka jingshisha ba ki paidbah ki la pynpaw ïa ka jingsngew jong ki halor kane bad ka Committee ka la shim jingthoh ïa baroh ki mat bad ki jingkyrpad jong ki.
“Ki Sorkar jong ki ar Jylla kin sa shong bad ki ar tylli ki Regional Committee, bad halor ki kaiphot jong ngi kin sa shim rai ïa kane ka kam”, la ong u Bah Dhar.
U la pyntip ba ka Regional Committee kan sa shong jingïalang biang ha ka taïew ba-ar ne balai jong u Kyllalyngkot, 2025.
Ha kawei ka liang, u Symbud Myntri Rangbah u la pynpaw ba ka Sorkar ka la kut jingmut ban pynbeit ïa ki kam khappud.
“Ki Myntri Rangbah ka Assam bad Meghalaya kin sa pynbeit shen ïa ka tarik ban leit jurip ïa kine ki jaka ba don hapdeng ka jingïakajia”, la ong u Symbud Myntri Rangbah.
