Shillong, Nohprah 19
Ka Khasi Hills Autonomous District Council (KHADC) ka la shim ïa ka rai ban kyntu ïa ka Sorkar ba ka dei ban ïasyllok bad pan jingmut shwa na ka Council bad na ki kynhun bapher-bapher kiba don bynta ha shwa ban pyntreikam ïa ka Meghalaya State Investment Promotion Facilitation Act, 2024, kaba ai bor ïa ka Invest Meghalaya Authority (IMA) ban thied jaka bad ai wai pat sha ki kompani seng kam.
Haba wanrah ïa kane ka rai (resolution) ha ka jingïatai ha ka dorbar tlang kaba la sdang ha ka 18 tarik Nohprah, u Chief Executive Member ka KHADC, Bah Pynïaid Sing Syiem, u la ong ba ïa ka khyndew lane ka jaka ka hap hapoh ka jingpeit jong ki Dorbar Shnong, Dorbar Raid, Dorbar Hima; ka dei ka rukom treikam kaba la pynneh pynsah ïa ka jingithuh ïa ka jinglong kyrpang jong ki paid Khasi.
“Ki Dorbar Shnong, Dorbar Raid bad Dorbar Hima ki dei ki bor treikam kiba don ïa ka bynta kaba khraw bha ban ïada ïa ka riti dustur bad ka riti bat khyndew jong ki paid Khasi. Ka Khasi Hills Autonomous District Council, kumba la pynkup bor hapoh ka Khyrnit ba Hynriew jong ka riti synshar ka dei ban pynneh pynsah ïa ka jinglong tynrai ha ka rukom bat khyndew”, u la ong.
Haba kdew ba ki khlieh nongsynshar ki don ïa ka bynta kaba khraw ban pynneh ïa ka dustur bat khyndew, u CEM u la ong ba ka Meghalaya State Investment Promotion and Facilitation Act, 2024 kan ïatyngkhuh bad ki kyndon hapoh ka Khasi Hills Autonomous District (Regulation and Administration of Land) Act, 2021, bad kan ktah ruh ïa ka jingsngew jong ki paidbah trai ri.
“Ka jingtyrwa ban pynkylla ïa ka MSIPF Act, 2024, ka ban ailad ïa ka IMA ban thied jaka bad ai jaka sha ki nongseng kam kan sa ïatyngkhuh bad kiba bun ki kyndon jong ka Khasi Hills Autonomous District (Regulation and Administration of Land) Act, 2021”, la bynrap u CEM.
Haba shim bynta ha kane ka jingïatai, u MDC ka UDP na Sohra uba dei u Nongïalam ka Liang Pyrshah, Bah Titosstarwell Chyne u la ong ba ki sengbhalang bad ki ‘riew pawkhmat ka Jylla ki la pynpaw ka jingsngewkhia halor ka jingwanrah ïa ka IMA ban thied jaka na ki paidbah.
U la ong ba ka Sorkar Jylla ka dei ban pynshai ban weng ïa ki jingartatien namar kane ka rai jong ka Sorkar kan ïatyngkhuh bad ki aiñ ka KHADC ba kynthup ka Khasi Hills Autonomous District (Regulation and Administration of Land) Act, 2021.
