Shillong,Nohprah:
Ka SWITCH Mobility Ltd, ka shnat treikam jong ka Ashok Leyland ha kaba ïadei bad ki kali elektrik, ka la sdang ïa ka jingtreikam ha ka liang kaba ïadei bad ki kali kibym ktah ïa ka mariang da ka jingpyllait paidbah ïa ki ar jait ki bus elektrik kiban ïaid ha sor- kawei ka SWITCH EiV12 na ka ka bynta ka India bad ka SWITCH E1 na ka bynta ka Europe.
Ka SWITCH EiV12, kadei ka bus ba nyngkong ha India kaban ïaid ha sor bad ka madan jong ka, ka long kaba hiar bha sha poh ne kaba lyngkot na khyndew bad ka don ruh ïa ki Battery ba don ïa ka Chassis, ka lah ban kit haduh 400+ kWh ka jingkhlaiñ u battery, ïa kaba la shna kyrpang na ka bynta kiba lei tba wan ha jaka sor. Ia kane ka bus la pyllait paidbah da u Nitin Gadkari, Myntri ka tnad Road Transport bad Highways ka sorkar India, bad kane ka bus ka long kaba shngaiñ, kaba aram, bad kaba ki briew ki lah ban pyndonkam, ha kaba la shna pynwandur ïa kane ka bus ba kan long kaba shngaiï na ka bynta ki kynthei, ka don ruh ïa ki CCTV camera, bad ka don ïa la ka jong ka jaka shong na ka bynta kito kiba duna dkhot met.
Ha kawei pat ka liang, ka SWITCH E1, ïa kaba la shna na ka bynta ka ïew ha Europe, ka kham pher namar ba ka don ïa ka In-wheel motor bad ka don ruh lai tylli ki jingkhang khnang ban suk ka rung ka mih jong ki nongshong bus. Namar ba ka ïew jong ki bus elektrik kan kiew ha India ha ka CAGR kaba long 21% kat ha ka snem 2030, ka SWITCH Mobility khlem pep kan don ha ka bynta ba ha khmat eh ha kaba ïadei bad ki kali kamai ki bym pynjot ïa ka mariang.
Ka SWITCH EiV12 ka don ka bynta kaba kongsan bha. Katba ka nongbah ka dang pyrshang ban wanrah ïa ki lad ki lynti ban pynduna ïa ki jingeh kiba mih na ka jingkylla ka mariang bad kumjuh ïa ka jingkhapngiah jong ka sor, ka jingpynmih ia kine ki bus elektrik kan long kum ka lad ban wanrah ïa ka jingkhuid, kan pynsuk ïa ka leit ka wan ki paidbah, kan pynbha ïa ka lyer bad ka jingïaid ki kali ha ka thaiñ.
