Shillong, Nohprah 19
U Symbud Myntri Rangbah ka Jylla uba dei ruh u Chairman ka Regional Committee pynbeit pud, Bah Sniawbhalang Dhar u la ïathuh ba ka Regional Committee ka la ïakren sani bha ïa ka jingkyntur pud jong ka Karbi Anglong Autonomous Council (KAAC) ha Khanduli, bad na ka liang ki bor district ka West Jaiñtia Hills ki la kyntu ïa ki bor ka Assam ban sangeh ïa ka jingthmu ban pynjulor ïa ka surok ha katei ka shnong.
“Namar katei ka jaka ka dei kaba don hapdeng ka jingïakajia bad ba hap pynbeit, ngi la bthah ïa ki bor district ba kin phah sangeh mardor ïa ka jingkyntur jong ka KAAC tat haduh ba ki ar Sorkar kin shong ban pynbeit”, u la ong.
U la ong ruh ba kum kine ki jingjia ki ju mih man la ka por, hynrei namar ba ka dei ka jaka ba hap ban pynbeit ki dei ban ieh shwa mynta kumba ka long.
U la ong ba ki don ki jaka ba ki ar jylla ki hap ban ailad ban pyntrei ïa ki kam pynroi, kata ruh ha shwa ban leh ïa kano-kano ka kam pynroi ki la dei ban pyntip ïa ki bor district ka Meghalaya.
“Imat ïa katei kaba ki leh ki khlem pyntip sha ki bor district. Ngi la ong ïa ki ban sangeh shwa mynta bad ba kin ai ka jingïatreilang”, la ong u Bah Dhar.
Ki bor ka Karbi Anglong Autonomous Council (KAAC) ryngkat ki puh shilum ha ka Lah Sngi U Blei ka 16 tarik mynta u Nohprah, ki la tur jubor sha ka shnong Khanduli, West Jaiñtia Hills District da ka jingthmu ban pynjulor noh ïa ka surok ba la shna da ka Sorkar Meghalaya.
Katkum ka dur khih (video) ba la saphriang ha ki lad pathai Social Media la ïohi ar tylli ki puh shilum kiba la tur sha ka shnong Khanduli ban lur ïa ka surok kaba pynïasoh sha Hamren, West Karbi Anglong. La ïathuh ba ha katei ka sngi la synran lang ruh da ki pulit Assam bad ki ‘riew paidbah na Assam.
Haba wad jingtip halor katei ka dur khih, la ïathuh ba katei ka la jia ha ka por kumba saw duna eiei janmiet, ha kaba na ka liang ki nongïalam shnong ka Khanduli ki la leit ban tuklar bad lah ban phah pynsangeh noh shwa ïa katei ka jingthmu jong ka Sorkar Assam.
