Shillong, Nohprah 19
Kan long shisha ka khubor ban kyndit ban tip ba u kpa um treh ban leit ïalap ilekshon ïa ka khun haba ka kwah ban ïakhun ïa ka ilekshon. Kane ka la jia ïa u Bah Bindo M Lanong uba dei u MDC ba shu sieh da ka Sorkar Jylla uba dei ruh u MLA barim bad Myntri barim ka Sorkar Jylla namar u la kren shai ba un nym leit ïalap ilekshon ïa la ka jong ka khun kynthei Kong Deity Majaw haba kan ïakhun ïa ka ilekshon MDC na ka Voice of the People’s Party (VPP) sha KHADC.
U Bah Bindo u la shu kitbok ïa ka khun haba kan ïakhun ïa ka ilekshon na Laitumkhrah-Malki konstitwensi.
U la ïathuh ba um don daw eiei ban nym ïakhun shuh ïa ka ilekshon MDC hynrei un shongthait noh namar hynriew sien u la jop kum u MDC bad shisien la shu thung da ka Sorkar Jylla.
“Kumno ngan leit kanbas ïa ka khun haba ngam dei u dkhot ka VPP, ngan shu kitbok namar nga dei u briew uba don ïa ka nongrim,” u la ong.
U la pyntip ba u long uba laitluid naduh ba u la shah leh kiar na ka UDP hynrei mynta u la kyrshan ïa ka NPP hapoh ka jingïalam u Bah Pynïaid Sing Syiem ha KHADC.
Shuh shuh u Bah Bindo u la ong biang ba wat la ki paidbah ki kyrshan ïa ka VPP ha ka ilekshon MP Lok Sabha hynrei ha ka ilekshon MDC kan nym long kumta namar haduh mynta ym pat ïohi dak eiei ba kin pyni ïa ka jingtreikam.
