Shillong, Nohprah 19
Ka jingmih ka kyrteng jong u Bah Nathaniel Rymmai uba dei u khun jong u MLA barim ka Sohïong konstitwensi Bah HDR Lyngdoh (bam kwai ha dwar u Blei) kum u kyrtong ka Congress ban ïakhun ïa ka ilekshon MDC ka la pynkyndit hi thret kumba ïuh tdong bseiñ ïa baroh ki paidbah ka Sohïong konstitwensi.
Kane ka jingmih ka kyrteng u Bah Nathaniel Rymmai ban ïakhun na ka Congress na Sohïong-Nongspung konstitwensi ha ka jingpynbna ka Congress ha ka sngi Palei, ka la paw pyrthei ba ka la don ka jingïapher jingmut hapdeng u Bah Nathaniel Rymmai bad u MLA ba mynta na ka UDP u Bah Synshar Lyngdoh uba dei u pyrsa jong u Bah HDR Lyngdoh.
Kum ban shu pynkynmaw, ka jingbym lah ka UDP ha Sohïong konstitwensi ban pynbna ïa u kyrtong ha ka wat kaba nyngkong ka lah ban dei ba u MLA ka UDP ba mynta u Bah Synshar Lyngdoh un don ka jingïapher jingmut bad u bakha (Nathaniel Rymmai).
Katkum ka khubor ba la ïoh lum, kane ka jingïapher jingmut ka la sdang mynta la katto-katne bnai hadien ba la jop u Bah Synshar Lyngdoh ïa ka ilekshon MLA na Sohïong ha u snem 2023.
Kum ban shu pynkynmaw, u Bah Nathaniel Rymmai u dei uwei uba hakhmat ban kyrshan ïa u Bah Synshar Lyngdoh kaba baroh ha Sohïong ki tip kum u Bah Pup hynrei ka jingmih ka kyrteng u Bah Nathaniel Rymmai ha ka thup jong ka Congress ban ïakhun ïa ka ilekshon MDC ka la pynkyndit thret.
Kum ban shu pynkynmaw biang, u Bah HDR Lyngdoh kum MLA ba la khlad na Sohïong konstitwensi u la jop bunsien na ka Congress. Hynrei ha ka ilekshon MLA ha u snem 2023 u la ïakhun na ka UDP bad shwa ban dei ka sngi thep ‘vote’ u la khlad noh bad ha jaka jong u Bah HDR Lyngdoh la pynïeng bujli noh ïa u pyrsa (Bah Synshar Lyngdoh).
Haba U Nongsaiñ Hima u la pyrshang ban wad jingtip ïa ka jingïapher jingmut hapdeng u Bah Nathaniel bad u Bah Synshar ym shym la ïoh.
Ha kawei ka khubor la ïoh jingtip ba u Bah Synshar Lyngdoh uba dei u MLA ba mynta na ka UDP u lah ban ïakhun hi ïa ka ilekshon MDC na Nongspung-Sohïong konstitwensi.
