Shillong, Nohprah:
Ka Toyota Kirloskar Motor (TKM) ka la nang kham pynskhem shuh shuh ïa ka jingkut jingmut ban buh shwa ïa ki nongthied hakhmat eh da kaba pynmih ha ka sien kaba nyngkong ïa ka jaka ba buh tang ïa ki kali jong ka kompani Toyota kiba la dep ban pyndonkam ïa kaba la tip kum ka Toyota Used Car Outlet (TUCO) ha ka thaiñ Shatei-lam- Mihngi ha Guwahati.
Kane kadei ka jaka die kali balai ha India hapoh jong ka kyrteng “Toyota U-Trust”, ki ar tylli kiba kum kine ki jaka die kali ki don kawei ha Bangaluru bad kawei pat ha Delhi.
Ïa kane ka sienjam la wanrah khnang ban ai sha ki nongthied ïa ki kali kiba bha, ki kali kiba la dep pyndonkam hynrei kiba shngaiñ, ïa kaba la buh ruh ha khmat ïa ka jingsuk, ka jingkhuid jingsuba ha ka jingpynïaid ïa ka kam, bad khnang ba ki nongthied kin ym don kano kano ka jingklumar jingmut ha shi lynter jong ka kam kaba ïadei bad ka jingthied ne jingdie jong ki ïa ka kali.
Ka jingheh jong kane ka jaka die kali kaba thymmai ka long 4,000 phut sawdong bad hangne lah ban pyni haduh 15 tylli tam ki kali Toyota.
Haba kren shaphang kine kiei kiei kiba ïadei bad ki jingshakri jong ka kompani ha kaba ïadei bad ki kali rim, U Takashi Takamiya, Vice President, Toyota Kirloskar Motor, u ong, “Kane ka jaka die kali kaba thymmai ka long kaba biang bha ha ki rukom treikam kaba ïadei bad ki mar jong ka Toyota bad ki jingai ïa ki jingshakri kiba bha tam”.
