Shillong, Nohprah 19
Hadien ba u MDC ba mynta ka Mawlai, Bah Teiborlang Pathaw, u la kren artatien ban ïakhun biang ïa ka ilekshon MDC ka ban sa long ha u Rymphang 2025, ka sur kaba jam ka la sawa ba um dei ban shongthait noh hynrei ban mih aireng beit ha ka ilekshon.
Ki Nongïalam jong ka Mawlai Social Service Organisation (MSSO) ha ka 19 tarik Nohprah, 2024, ki la lum ïa ki paidbah ka shnong Mawlai ban ïakren halor ka jingpynpaw u Bah Teibor ïa ka jingartatien ban ïakhun ïa ka ilekshon.
Na ka liang ki paidbah kiba la poi sha katei ka jingïalang dap 8 snem ka MSSO, ki la pynpaw ba kin ym shah ïa u Bah Teibor ban kynrandien na ka jingïakhun ïa ka ilekshon, ha kaba ki la pynpaw ruh ba kin don beit bad u ban trei shitom bad pynjop biang ïa u ha kane ka kynti.
“Lada phi Bah Teibor phi kynrandien noh kan long kumba phi la ieh khunswet ïa ka shnong Mawlai”, la ong uwei na ki nongkyrshan.
Kawei ka longkmie ka la ong ha shnong Mawlai ki don shibun ki jingdonkam, namar ki don bun ki briew kiba donkam ïa ka jingïarap jong u nongmihkhmat ha ka khia ka shon.
Uwei pat u rangbah u la ong ba ka MSSO ka donbok ba ka don ïa u Nongïalam u bym shong kli kti.
“Phi dei ban ïeng ban kit ïa kane ka kam kaba ki paidbah ki la tynrong ha phi, ngi dang donkam ïa phi ba phin ïaleh ïa ka ilekshon. Lada ngi phai baroh ki liang ngi dang donkam u briew ba kum ma phi ban kit ban bah ïa ka khia ka shon ha ki longïing longsem ne kino-kino ki bynta ka shnong Mawlai”, la ong u Vice President ka MSSO.
Lah ban pynkynmaw ba ha ki khyndiat bnai ba la dep, u Bah Teiborlang Pathaw u la pynpaw ba u lah ban nym ïakhun shuh ïa ka ilekshon MDC, da kaba kdew ba ka jingangnud kaba u don ka la sahkut tang ha u marwei.
U Bah Teibor u la ïathuh ba u la ïakhun ïa ka ilekshon MLA haduh 3 sien, hynrei u khlem poi sha ka thong, bad hadien ba u la jop ïa ka ilekshon MDC ha u snem 2019 u la pyrshang ban pynpaw ïa ki jingangnud ban trei, pynban ki jingangnud jong u kim rung satia ha ki nongshong shnong ka Mawlai bad kim ibit ïa u ban long uta u nongmihkhmat.
