Shillong, Nohprah 19
Ka Khasi Students’ Union (KSU) lyngba ka Employment Monitoring Cell ka la pynher shithi sha u Chief Secretary ka Jylla, Bah DP Wahlang halor ka jingbym shaniah ïa ka risol jong ka ‘mains’ jong ka MCS bad ka jingpynslem kumjuh ka kynrum-kynram ha ka post typist.
Ha ka kyrwoh khubor ba la pyllait da u Chairman ka Employment Monitoring Cell, samla Reuben Najiar, u la pynkynmaw ba ka KSU ha kine ki khyndiat bnai ba la dep ka la ïakhih ban pynbor ïa ka MPSC ba kan pynmih ïa ki marks jong ka Prelims jong ka MCS bad halor kiwei kiwei ki mat. Hadien ba ka MPSC ka la pyndem bad pyllait ïa ki marks la ïohi shibun tylli ki jingbakla.
Ka seng ka la phah ruh ïa ki 20 tylli ki mat jingdawa sha ka Sorkar ban pynthymmai ïa ka rukom treikam ha ka MPSC bad na ka liang ka Sorkar ka la thaw ïa ka committee ka ban lamkhmat da u Bah FR Kharkongor bad kiwei. Kane ka committee kan shong ban bishar bad ban pynbeit ïa ka rukom treikam bad kan ai ïa ka kaiphod ha lane shuwa ka 30 tarik u Kyllalyngkot, 2025.
Ka kyrwoh ka long ba hynrei katba ka committee ka dang shong pyrkhat, ka MPSC ruh ka pyndep wut-wut ïa ki eksam da kaba leh bor ban pynkhuid bad tap eit miaw ïa ka jingbamsap ka jong ka. Ïa kane lah ban pynshisha da ka risol MCS.
Shuh shuh la ong ba ka MPSC ka la pynmih ïa ka risol jong kiba ïaleh ïa ka ‘mains’ jong ka MCS ha ka 6 tarik u Nohprah, 2024. Ha kane ka risol la ïohi ba 9 ngut na kita ki ‘additional list’ ki la pass ïa ka eksam. Ki kyrtong ba ïaleh ïa kane ka eksam ki pynsngew ba ka long kaba sngewphylla ba tang hapoh katto-katne bnai ba ki ïoh por ban pynkhreh ïa ka eksamin, kine ki lah ban pass ïa kane ka eksam. Hynrei kito 580 ngut pat ki bun kiba khlem pass bad ka jingbym pyllait ïa ki marks ka pynartatien ïa ki nongthoh eksamin ba ka lah ban don eiei sha lyndet.
Ka KSU ka la ïoh bun tylli ki jingujor halor kane ka bynta. Ki kyrtong ki la batai sha ka seng ba haba ki leit sha ka MPSC ban tip ïa ka marks ka jong ki bad ban pan ïa ka ‘cutoff marks’, kim shym la lah ban ïoh satia ïa kata. Don napdeng jong ki ba la pan ïa ka RTI ruh, hynrei ka MPSC kam shim ïa ka aplikeshon ka jong ki bad don kiba shah byrngem ruh ba ki thoh RTI. Don na ki kyrtong kiba pyneh ïa ka MPSC halor ka jingbym shim ïa ka RTI bad kum ïa kita ka pdiang hynrei ka phah ïa ki ba kim ym bit ban buh ïa ka jingkylli kaba kam lah ban jubab bad ka ong ruh sha ki ba kan jubab ïa ka RTI ynda la dep ka personal interview.
Kine ki jingleh na ka liang ka MPSC ka pynshan khmat ïa ka seng ba ka don kaei-kaei sha lyndet ba ka MPSC ka ïaleh ban buhrieh. Shuh shuh balei ba la salia ban pynmih ïa ki marks, ka MPSC kam lah ban rieh halor ka daw ba da kaba pynmih ïa ki marks kan ktah ïa ka personal interview namar kane ka eksam kam dei shuh tang na bynta kito ki kyrtong kiba ïaleh hynrei ïa baroh ki samla wad kam ban don ïa ka jingshaniah ba ka thung kam thung jam ka long kaba khuid.
Kumta ka KSU ka dawa ba dei ban pyllait paidbah ïa ki marks bad ïa ka cutoff, bad ki samla ki dei ban ïoh peit ïa ka sla jubab ka jong ki.
Shuh shuh halor ka post Typist (HOD) ba la don bun tylli ki snem ba ka MPSC kam shym la lah ban pynmih ïa ka risol ka long kaei-kaei kaba pynpaw ïa ka jingbamsap napoh napoh ban thep ïa ki briew ki jong ki ne ki briew jong ki heh ki haiñ. Ka MPSC ka pynkylla ruh wat ïa ki aiñ ba la don lypa halor kumno ban thep ïa ka kam. Kumta ka KSU ka dawa ba ka rukom pynrung kam na bynta ki Typist ka dei ban ïaid beit thik katkum ka Meghalaya Directorate Establishment (Ministerial) Service Rules, 2010.
Ka KSU ka kyntu ïa u Chief Secretary ba un shimkhia halor kane ka bynta ban pynbeit ïa kine kynrum-kynram jong ka MPSC bad kam shym kwah ban ïakren bad ka MPSC namar la tip shai ba ka long kaba bamsap. Katba ym pat lah ban pynthymmai ïa ka rukom treikam jong ka, kan ym myntoi ïa ka seng ban ïakren halor kano-kano ka mat namar kan ym seisoh. Hynrei lada ka MPSC kam pynbeit ïa kine ki jingujor haneng, ka seng kan shim ïa ka sienjam kaba kham tyngeh, la pynkut ka kyrwoh khubor na ka KSU.
