Shillong, Nohprah 20
Ka Synjuk ki Seng Samla Shnong (SSSS) Shillong City ha ka 20 tarik u Nohprah, 2024, ka la leit ban ai da ka jingthoh ha ka Deputy Commissioner (DC) ka East Khasi Hills District, Kong R.M Kurbah ban dawa ba dei ban pynbna kum ka sngi tyrkhong kyiad ne ka ‘Dry Day’ ha ka 24 tarik bad 25 tarik u Nohprah, 2024 bad ruh ha ka 1 tarik Kyllalyngkot, 2025 ha baroh kawei ka East Khasi Hills District.
Ha ka jingïakren bad ki lad pathai khubor hadien ka jingwan ïakynduh ïa ka DC, na ka liang u General Secretary jong ka Synjuk, u Bah Vivan Richmond Kharkongor, u la ong ba kane ka jingdawa jong ka Synjuk ka dei hadien ka jingïohi ïa ka hukum kaba la pynmih ha ki khyndiat sngi kiba dang shu dep, ba yn ai sngi tyrkhong kyiad ne “Dry Day” tang ha ka 25 tarik u Nohprah, 2024 bad ong ba ha ki por kiba la leit, la pynbna “Dry Day” naduh ka 24 tarik bad 25 tarik u Nohprah bad kumjuh ruh ha ka 1 tarik u Kyllalyngkot.
U la ong ba kane ka jingdawa jong ka Synjuk ka long kum shibynta ban khanglad ïa kino-kino ki kam huri-hura ha ka sngi peit miet Khristmas bad kumjuh ha ka sngi ban pdiang ïa u snem thymmai.
“Ngi ngeit skhem ba ka DC kan shimkhia mardor ïa kane ka jingpynsngew jong ngi ka Synjuk khamtam ha ka 24 tarik lei kaba dei kawei na ki sngi ba ki briew ki shait rakhe ïa ka Khristmas bad ki Balang bapher-bapher ki ju ïaid ïa ki Khristmas Carol bad da kaba plie ïa ki dukan kyiad kan long kaei-kaei kaba ym pynitynnad khamtam ïa ki khynnah kiba ïaid Carol bad kiba rwai ïa ki jingrwai Khristmas”, ong u Bah Kharkongor.
U la ong ba ka Sorkar kan ym duhnong than ïa ka khajna ha kine lai sngi ki ban khang ïa ki dukan die kyiad namar ha ki sngi ba la dep, ka Sorkar ka la dep ban pynlong ïa shibun tylli ki tamasa kiba la pynïohnong ïa ka Sorkar lyngba ka jingdie ïa ki jingdih.
