Shillong, Nohprah 20
Ka Hynñiewtrep National Youth Front (HNYF) ka la pynpaw ïa ka jingpyrshah kaba jur bha halor ka jingshim rai jong ka Sorkar Jylla ban pynbeit thymmai ïa ka Megha-laya State Investment Promotion & Facilitation (MSIPF), Act 2024 ka ban ailad ïa ka Investment Meghalaya Agency (IMA) ban thied jaka bad ban ai pat sha ki nongkynshew kam lane ki ‘Investor’.
Halor kane ka bynta, na ka liang ka seng ka la leit ruh ban buh da ka dorkhas hapoh ka shlem treikam jong u Myntri Rangbah ka Jylla, Conrad K. Sangma.
Haba kren sha ki lad pathai khubor ha Shillong Press Club ha ka 20 tarik u Nohprah, 2024 hadien ka jingwan buh ïa katei ka dorkhas, u Bah Sadon K. Blah uba dei u President rangbah jong ka seng, u la ong ba ka jingpyrshah jong ka seng ïa kane ka Aiñ ka dei kaba don nongrim namar ka jingthaw ïa ka IMA ka long kaba pyrshah ïa ka Land Transfer Act, 1972 jong ka KHADC bad ong ba kane ka IMA ka long kum ka mynnong (agent) jong ka Sorkar ban thied jaka na ka bynta ki bym dei ki trai Jylla.
“Ki kyndon jong ka MSIPF la pynkylla, kaba mut ïa ki jaka ba la buh ha ka khyrnit ba hynriew sha ki jaka ba la buh ha ka khyrnit ba san kaba long pyrshah ïa ka jingshaniah bad jingshngaiñ jong ngi ha ka riti synshar ka ri halor ka hok khyndew bad kaba pynlong ruh ïa ka Sorkar ba kan lah ban leh katba ka mon ïa ki jaka-ki puta”, ong u Bah Sadon.
U Bah Sadon u la ong ba ïa ka IMA yn khlieh da u CEO ka ban thung da ka Sorkar ha kaba u CEO bad ka IMA kin kylla long tang kum ki dur bula jong ka Sorkar.
“U CEO bad ka IMA ki dei ki dur bula jong ka Sorkar lyngba kane ka Aiñ bad lyngba ki kyndon jong kane ka Aiñ, ki la ai ruh ïa ka bor kaba jylliew bha ïa ka Governing Council bad ka High Power Committee, ïa kaba baroh ar la pynïaid da u Myntri Rangbah bad ka kynhun Myntri jong u na ka bynta ka jingpynlong khaïi kaba jylliew ïa ka jaka ha ka Jylla Meghalaya”, ong u Bah Sadon.
Shuh shuh, u Bah Sadon u la ong ba katkum ka Section kaba 36 jong kane ka aiñ ka la pynkhlaiñ bor shaba palat ïa u Myntri Rangbah ka Jylla bad ïa ki kynhun Myntri ban aplai jaka na ka bynta ki bym dei ki trai jylla bad ha kajuh ka por, ka Sorkar ka lah ruh ban shim rai bad leh katba ka mon ha ka ban pynwandur ïa kane ka aiñ ha kano-kano ka por katkum ka jingibit jong ki na ka bynta ban pyndonkam ïa ka jingthmu jong kane ka aiñ.
U la ong ba ka jingpynsuk ban shim jaka sha ki nongbei tyngka kan pynlong ïa kynhun shim jaka kiba la don lypa bad ki kynhun runar kiba shim jaka ba kin ïoh ïa ka bor kaba khlaiñ ha kaba ka IMA kan long ka bank jaka kaba ar bad ka kynhun shim jaka ha ryngkat ka jingïatreilang bad ki briew kiba don bor ha ka bor kan long ka bank jaka kaba nyngkong eh.
U la ong ba ka Aiñ MSIPF kam shym la buh kyndon ïa ka jingbun jong ka jaka ban shim lane ïa ka por ban shim ïa ka jaka kaba mut tang ïa ka jingdie bymjukut shabar ka jylla.
“Ka jingkheiñ ïa ka ïoh-ka kot kaba T. 10 klur ryngkat bad ki lad kamai kiba T. 5 lak, kumba la pynpaw da ka Sorkar, ka dei ka jingdawa kaba shu mutdur namar ba ym pat shai bha katno ka jingheh ka jaka bad katno tylli ki jait karkhana bad ha kano ka snem kan long ka ïoh-ka kot kaba T. 10 klur bad ka jingong jong ka T. 5 lak ka kam, kan sa long ka jingshisha, kan dei kawei pat ka jingkylli ka ban long da ki klur tyngka”, bynrap u Bah Sadon.
U Bah Sadon u la ai khublei ruh ïa ka Khasi Hills Autonomous District Council (KHADC) hapoh ka jingïalam jong u Bah Pynïaid Sing Syiem kum u CEM, kiba la pynpaw ïa ka jingpyrshah kaba jur bad ka jingbym lah ban pdiang ïa kane ka MSIPF, Act 2024.
“Kane ka dei ka jingma bashyrkhei bha jong kane ka Aiñ kaba ïaid lait ïa ka District Council bad kaba ïaid lait ïa ka rukom bat khyndew bat shyiap jong ka riti-dustur jong ngi”, ong u Bah Sadon.
