U Nongsaiñ Hima, 1979
Ha ka kyrwoh jong u Myntri Rangbah ka Meghalaya u Kapten Williamson Sangma sha ki paidbah ka Jylla ha ka jingdap phra snem ka jylla Meghalaya u la ong ba kane ka sem ka la long ka ban sah kynmaw ha kiba bun ki liang. Ka snem ka la sdang da ka jingkylla ha ka lyngwiar saiñ hima – sima da ka jingwan ka Sorkar Kmie kaba thymmai bad ruh ka jingwan ki sorkar thymmai ha bun kiwei kiwei pat ki jylla. Kane ka snem ka la iohi ïa ka jingïailong skhem jong u paidbah ha ka jingshaniah jong u ïa ka nongrim jong ka synshar paidbah bad ka jingpynkhie im pat ïa ki nongrim jong ka jinglaitluid. Hynrei ha kajuh ka por ka lynti jong ka lashai kan shong shibun ha ka jingïoh ban kheit ïa u soh jong ka longbha manbha ha ka jingim ba man la ka sngi jong u luk u lak, ka ban shong shibun kumno ki seng sain hima – sima kiba pher kin ïa kynduh ïa ki jingeh kiba mih na kawei ka por sha kawei pat da ka mynsiem jong ka jingïatreilang.
Ki paidbah bad ka Sorkar Meghalaya kim ju long kiba randien ha ki kam kiban pynstet ïa ka roi ka san jong kane ka Jylla Meghalaya, ka la long ruh halor ka nong-rim ban kyntiew ïa ka roi ka san sha ka kyrdan jong kiwei kiwei pat ki bynta jong ka Ri. U Kapten Sangma u la ong ba, u ngeit skhem ba ki paidbah bad ka Sorkar Jylla kin ïai buh barabor ha kane ka thong hakhmat jong ki wat hapdeng ki rukom treikam kiba pher jong ki seng saiñ hima – sima jong ka Jylla.
Ha kaba kren halor ka jingïoh ban kheit ïa ki soh kiba la ih na ka jingtrei shitom bad ka jingpynpaw ïa ka umsyep, u Kapten Sangma u ong, ba la don shibun ki dieng – pyngkiang kiba la hap ban ryngkang hapoh kane ka shi snem. Hynrei wat la katta ki thiar bad ki sup ka Jylla ki la lum haduh 1.47 lak tone ka jingpynmih ïa ka bam, u phan la pynmih haduh phraphew hajar tone bad ha kaba kut jong kane ka snem yn wanrah haduh shiphew hajar hektar ka khyndew rep hapoh ka ring – um – rep, ka ban pynmih ïa ka jingkyrmen ba ki lyngkha bad ki pyntha kin jyrngam da ki jingthung jynbet. Ha ka liang ki surok bad lynti – syngkien ki ban plie lad ïa ka kit ka bah ïa ki jingpynmih jong ki nongrep ki jongngi, yn don haduh kumba lai hajar san spah kilometer ha kaba kut jong kane ka snem. Ha ka liang jong ka thoh ka pule ka jingroi jong ki skul kiba ai jingnang jingstad ïa ki khynnah ki jongngi ka la long haduh 1.86 lak ki khynnah hapdeng ka snem 6 bad 11 snem. Ki skul middle ki la roi haduh 363 tylli kaba kynthup ïa ki khynnah hapdeng 11 bad 14 snem. Ki lad umbam umdih ki la poi mynta haduh 96 tylli ha ki kylleng ki nongkyndong jong ka Jylla. Ki nongkyndong kiba la ioh jingshai da ka dieng elektrik ki la long haduh 440 tylli hapoh kane ka snem. Ki jynthiah hapoh ki aspatal ki la kiew shaduh shi hajar tylli na ka 761 tylli ha ka snem 1973 – 74.
Halor ka synshar – khadar, la pynkhlaiñ ïa ka tang hapoh kane ka shi snem da ka jingthmu ba kan kham jan sha u paidtbah. La pynkha shuh shuh sa artylli ki district, 4 tylli sub – division bad 6 tylli ki administrative unit. Kane ka jingpynkha ïa kine ki shnat synshar ka long ban pynkhlaiñ ïa ka nongrim ha kaba ki kam pynroi pynsan kin lah ban ïeng bad ba ki jingtrei kam jong ki, kin lah ban long kiba beit bad kiba ryntih, ki ban lah ban wanrah ïa ka jingmyntoi ïa ka imlang sahlang bad ïa ka longbha manbha jong u rit u ria, u luk u lak, u kup shiliang u sem shiliang.
U Kapten Sangma ha kane ka kyrwoh ka jong u, u la pynshai ba ka Sorkar jong u, ka la pyntreikam ïa ki kam pynroi pynsan ha kylleng ki kyndong kynshrot jong ka Meghalaya, khlem da don kano-kano ka shah shiliang khmat ne ka thew shiliang. Ka Sorkar Meghalaya hapoh kane ka shi snem ka la ïaid da ka lynti jong ka ban pyndap pynbiang bad ïaleh ruh ban set ïa ka pei ka jot, khamtam ïa kito ki jaka kiba dang sahdien bad kiba kyndong tam.
U Kapten Sangma u la ong, wat ngi la leh ban kheit ïa ki katto katne ki soh ha-dien ka jingioh ïa ka jylla Meghalaya, hynrei ki kam kiba dang dei ban pyndep ki dang don hakhmat kaba ka Sorkar ka dang dei ban treikam da ka jingthmu ban kyntiew ïa ka ioh ka kot jong u paid byllien ka Jylla. U Kapten Sangma u la ong ba ngi dei ban dang ïai shakri ha kane ka snem thymmai, da ka jingshlur bad ka jingkyrmen ban pyndem ïa ki jingeh ha ka ban shakri ïa ka jylla.
