Shillong, Nohprah 20
Ka Khasi Hills Autonomous District Council (KHADC) ha ka sngi Thohdieng ka la shim ïa ka rai ban kyrshan pura ïa ka rai jong ka Dorbar Shnong Mawsynram ban khang leit lehniam ki Hindu hapoh ka krem Mawjymbuiñ.
Haba jubab halor ka phang ïatai ba la wanrah da u MDC ka UDP na Nongpoh, Bah Balajied Ranee ha ka sngi kut ka Dorbar Tlang, u Chief Executive Member ka KHADC, Bah Pynïaid Sing Syiem u la ong ba kane ka mat ka dang don hapdeng ka jingbishar ka Kashari High Court.
U la ïathuh ba na ka liang ka High Court ka la pynmih ïa ka hukum kaba bthah ïa ka ophis jong ka Deputy Commissioner, East Khasi Hills ban thaw ïa ka committee ka ban pynbeit ïa katei ka kam.
Lah ban kdew hangne ba kawei ka kynhun ki Hindu, ka Yatra Society ha u Nailar mynta u snem ka la mudui sha Kashari pyrshah ïa ka Dorbar Shnong kaba khlem ai jingbit satia ba kin ïaid pilkrim ban leit mane blei hapoh ka krem Mawjymbuiñ. Dei halor kane ka jingujor ba ka Kashari ka la bthah ïa ka Deputy Commissioner ban thaw ïa ka committee ban shim ïa ka rai kaba lah ban pdiang da baroh.
U CEM u la ong ba kane ka jingbyrngem ka KSP ka long pyrshah ïa ka hukum jong ka Kashari bad ka long be-aiñ namar kane ka jingbyrngem jong ki ka lah ban wanrah ka jingïakynad hapdeng ki paidbah ka Meghalaya bad Assam.
Na ka liang u CEM u la kyntu ruh ïa ka Sorkar Jylla ban shim khia halor kane bad ban pynkhlaiñ ïa ki bor pahara khnang ba ki paidbah kin ym shah ktah na ka jingbyrngem ka KSP.
Hashwa ïa kane, haba shim bynta ha ka jingïatai u Nongïalam Liang Pyrshah ha KHADC, Bah Titossarwell Chyne u la kyntu ïa ka KHADC ban kyrshan pura ïa ka rai ba la shim da ka Dorbar Shnong Mawsynram.
U la ong ba ka KHADC kam lah ban shu ieh ïa ka Dorbar Shnong Mawsynram marwei ban ïakhun ïa kane ka mat, bad bynrap ba kum ki paid riewlum donkam ban ïeng tylli lang kawei namar kane ka dei ka jingma ïa ka jaidbynriew.
U la ong shuh shuh ba kane ka jingbyrngem ka seng Hindu na Assam, kam dei tang ka jingshah byrngem ka Sorkar Jylla, hynrei ka dei ka jingbyrngem lang ïa ka Dorbar Shnong, ka Hima Mawsynram, ka KHADC bad ki paidbah nongshong shnong ka Meghalaya baroh kawei.
“Ka KHADC kaba dei ka nongïada ïa ka khyndew ka shyiap ha Rilum Khasi ka dei ban shim ka jingkitkhlieh halor kane ka jingbyrngem ka seng Hindu na Assam. Ngi dei ban pynrem jur ïa kane ka jingbyrngem ka seng Hindu kaba dawa ban shah lehniam ha krem Mawjymbuiñ. Ngi dei ban kren shai ha kane ka seng ba kane ka krem ka don ha ka jaka kaba dang hap hapoh ka Khyrnit ba Hynriew bad ka dei ka jaka ba la ri la sumar da ka Dorbar Shnong Mawsynram”, la ong u Bah Titos.
U MDC ka UDP na Sohra u la ong ruh ba um pyrshah ïa kano-kano ka jinglehniam, hynrei ka krem Mawjymbuiñ kam dei ka jaka lehniam bad kam don kano-kano ka sakhi ba ka dei kaba la lehniam da ki riewngeit Hindu da ki spah snem kumba la kam kane ka seng.
