Shillong, Nohprah 20
Ka Hill State People’s Democratic Party (HSPDP) ha ka Sngi Thohdieng ka la ïoh ban pyllait ïa ka thup kyrteng banyngkong jong 8 ngut ki kyrtong ki ban ïa aireng sha ka ilekshon Khasi Hills Autonomous District Council (KHADC) bad Jaiñtia Hills Autono-mous District Council (JHADC).
Ka ilekshon sha ka KHADC bad JHADC kan long ha ka 21 tarik Rymphang jong u snem ban wan.
Na kitei 8 ngut kiba ka seng ka la pynbna, 6 ngut kin aireng sha ka KHADC katba 2 ngut sha ka JHADC.
Kitei 6 ngut ki kynthup ïa Bah Jubanlang Kharbihkhiew na 18-Mawkhar – Pynthorumkhrah, Bah Lurshai Lyngwa na 19-Jaïaw – Mawprem, Bah Stondingstar Thabah na 22-Nongspung – Sohïong, Bah Polanding Sohphoh na 25-Mawkyrwat, Kong Badariti Lyngdoh Nonglait na 27-Nongstoiñ bad Bah K. Phlastingwell Pangniang na 28-Rambrai Jyrngam.
Ha kawei ka liang, ki 2 ngut na bynta ka JHADC ki kynthup ïa u Bah Neh Langki Pala na 25-Sutnga Nongkhlieh bad u Bah Wanshwa Nongtdu na 28-Narpuh.
