Shillong, Nohprah 20
U Symbud Myntri Rangbah ka Jylla, Bah Sniawbhalang Dhar, u la thalaiñ ïa ka seng ki Hindu na Assam, ka Kutumba Surakshya Parishad (KSP), da kaba ong ba ka Sorkar kam treikam hapoh ka jingshah byrngem jong kano-kano ka kynhun, bad ym don ba lah ban shim ïa ka aiñ ha ka kti lajong.
Kane ka jingkren u Symbud Myntri Rangbah ka Jylla ka long haba kylli halor ka jingbteng ka KSP ban byrthen pakhang ïa ka surok kaba rung sha Meghalaya lada ka Sorkar kam lah ban plie noh ïa ka krem Mawjymbuiñ ha Mawsynram hapoh ka 23 tarik mynta u Nohprah ban leit mane blei ki Hindu.
Haba kren bad ki lad pathai khubor, u Bah Dhar u la ong, “Ka Sorkar kam treikam hapoh ka jingshah byrngem jong kano-kano ka kynhun, ym don ba lah ban shim ïa ka aiñ ha ka kti lajong. Hooid, lada phi don eiei ba ïadei bad ka Jylla, ngin ïa bishar ïa kita kam don jingeh”.
U la ong ki briew kiba na shabar kim don hok satia ban byrngem lane ai por ïa ka Sorkar Meghalaya, bad ki dei ban tip ïa ka rukom bat khyndew ha kane ka Jylla.
“Kita ki dei kiei? Ki dei ban tip ba ka rukom bat khyndew ha kane ka Jylla ka dei ha u paidbah, ka dei ka khyndew jong ki riew shimet bad lada ki kwah ban leh kumno-kumno ruh ka shong ha ki trai jaka”, u la ong.
“Ha kaba ïadei bad ka kam khyndew ka dei ka nongkynti jong ka Shnong bad ka Hima, ki la dei ban ïapynbeit bad ki”, la bynrap u Bah Dhar.
Lah ban kdew ba ka seng Hindu na Assam, ka Kutumba Surakshya Parishad (KSP) ha ka 17 tarik mynta u bnai ka la byrngem biang ïa ka Sorkar Jylla, ba ka dei ban plie noh ïa ka krem Mawjymbuiñ hapoh ka 23 tarik mynta u Nohprah, khnang ba ki Hindu kin ïoh leit lehniam, lem kumta ka Meghalaya kan hap ban mad ïa ka jingshah pakhang surok.
Katei ka kynhun ka la dawa ruh na ka Sorkar Meghalaya ba ka dei ban lum ïa ka jingïalang bad baroh ki kynhun ha kaba ïadei bad ka jingplie biang ïa ka krem Mawjymbuiñ, da kaba ai por haduh ka 23 tarik Nohprah kum ka sngi ba khatduh ban pynlong ïa ka jingïalang bad ban pynbeit ïa ka jingleit jurip sha krem Mawjymbuiñ.
