Guwahati, Nohprah 22
Ka seng Hindu ka Kutumba Surakshya Parishad (KSP) na Assam, ka la byrngem ban pynlong ïa ka jingïa- khih ha Byrnihat la 24 tarik Nohprah namar ka jingbym urlong ka jingdawa ban plie ïa ka Krem Mawjymbuiñ ban ïoh lehniam ki paid Hindu.
Ka KSP kaba la buh ïa ka 23 tarik Nohprah kum ka por ba khatduh ïa ka Sorkar Jylla ba kan pynbeit ïa ka jingïalang bad baroh ki kynhun nalor ban pynbeit ïa ka jingleit jurip jong ka kynhun sha Krem Mawjymbuiñ.
Kane ka Seng ka la byrngem ban pynlong ïa ka pakhang surok ha ka 24 tarik Nohprah ha ka thaiñ Byrnihat.
Ka krem Mawjym- buiñ kaba la pawnam ïa ka jingdon u mawjymbuiñ ba ïasyriem kum u maw lehniam Shiva, ka dei kaba la khang ïa ki paid Hindu ban wan lehniam naduh u Nailar 2024 hadien ka rai jong ka Dorbar Shnong Mawsynram.
Ki ar tylli ki seng Hindu ba kynthup ïa ka Sanatani Gagrata Prahari bad ka Hindu Surakshya Sena, ki la pynthikna ïa ka jingïashim bynta lang ha kane ka jingïakhih jong ka KSP.
U President ka KSP, Satya Ranjay Borah ha ka kyrwoh u la pynthikna ïa ka jingwan ïashimbynta lang jong kine ar tylli ki seng.
U Borah u la ban jur ba kane ka jingïakhih ka dei ka hok ban pynlong katkum ka riti synshar ka ri bad ka dap ban pyni ïa ka jingaiti lut ha ka ban pynneh ïa ka dustur hiar pateng, kumba la kdew ha ka Article 51(A) jong ka Riti Synshar ka Ri India.
“Kane ka dei ka jingkyrpad ba khatduh jong ngi ïa ki bor khmih ba kin pynbeit ïa ka jingïalang na ka bynta jong ngi bad ki kynhun bapher bapher bad ban pynbeit ruh ïa ka jingïaleit jurip sha krem Mawjymbuiñ hapoh ka por ba la buh. Ngi la leh ïa la ka kamram jong ngi kat kumba la pynkup bor ha ka Article 51(A) jong ka Riti Synshar ka Ri India,” la ong u Borah.
U la ong ba ha ri synshar paidbah kum ka India, ki don ïa ka hok ban pyni ïa ka jingpyrshah jong ki ha kano-kano ka bynta jong ka Ri kaba dei halor kano-kano ka kam.
“Ngi kwah ban phah ïa ka jingkyrpad jong ngi sha ka ophis u Myntri Rangbah ka Meghalaya ba kin khmih ïa kane ka kam bad ban leh ïa kaba donkam ban leh kham kloi kat kaba lah. Lym kumta, ngin pynlong ïa ka jingïakhih jong ngi ha Byrnihat ha ka 24 tarik Nohprah,” u la ong.
