Shillong, Nohprah 22
Ki paidbah nongshong shnong jong ka Laban Mawprem Konstitwensi ha ka sngi Thohdieng ki la pynsawa jam ka sur ba u Bah Ricky Shullai u dei ban mih ïakhun ha ka ilekshon MDC ka ban long ha u bnai Rymphang jong u snem 2025 bad ba u dei ban mih kum u kyrtong shimet.
Kane ka jingpynsawa sur jong ki paidbah ka la long hadien ba u Bah Ricky Shullai ha kane ka sngi u la lum ïa ki paidbah ban sngap ïa ka sur jong ki, la un mih ne em ban aireng ha ka ilekshon MDC.
Lah ban pynkynmaw ba u Bah Ricky Shullai u la jop ïa ka ilekshon MDC shiteng samoi ha u snem 2016, wat la tang ha ki ar snem ba u la long MDC bad trei shibun ki kam na ka bynta ka bit ka biang jong ki shnong ki thaw, hynrei u la shah rem noh ha ka ilekshon kaba la long ha u snem 2019.
Kumta dei halor kane ba une u samla rangbah u la lum la lang biang ïa ki paidbah bad ha kaba ïa ka kyrteng jong u Bah Ricky la kyrshan da ki piadbah kiba la mynjur ruh ba u dei ban ïakhun noh kum u kyrtong shimet ha kane ka ilekshon MDC.
Ha kane ka jingïalang la ïohi ïa u paidbah ba bun uba la wan ban sakhi bad kyrshan ïa ka jingthmu jong u Bah Ricky ban mih aireng kum u kyrtong shimet.
“Nga dap da ka jingkmen kaba khraw ban ïohi ïa ka jingieid jong phi ki paidbah ba wat hadien 6 snem ba ngam don shuh ha ka bor kum u nongmihkhmat, hynrei phim shym la iehnoh bad ba phin wan katne katne ban ai ka jingkyrshan bad mynsiem ïa nga,” ong u Bah Ricky ha ka jingïalang kaba la pynlong.
U Bah Ricky u la ong ruh ba kum u briew uba thrang ban trei bad shakri ïa ki paidbah ka thaiñ ha ki por baroh u khmih lynti sa shisien pat un ïoh ban pynjanai shuh shuh ïa ka jingshakri da ka jingkyrshan radbah na ki paidbah ha ka ilekshon kaban long ha ka 21 tarik u Rymphang, 2025.
Ki katto katne nongkren kiba la ai jingkren ki la pynpaw ka jingkmen halor kane ka rai bad ong ruh ba ka jingmih shakhmat jong ki, ka dei lyngba ki kam kiba u Bah Ricky u la trei na ka bynta ka bit ka biang jong ki shnong ki thaw tang ha ki ar snem eiei ba u la long MDC.
Shuh shuh ki la pynpaw ruh ka jingsngewnguh ïa u Bah Ricky wat la u la rem ha ka ilekshon MDC kaba la dep hynrei um shym la iehnoh bad ban ïai don ryngkat bad u paidbah ha ka khia ka shon ne ha kiwei kiba bun ki kam.
