Shillong, Nohprah 22
Ki shipai Border Security Force (BSF) jong ka Meghalaya Frontier ki la ïoh ban kurup noh ïa ki mar kiba la thmu ban khaïi tuh sha Bangladesh kiba shongdor haduh T.31.13 lak.
Ïa kine ki mar la ïoh ban kurup ha ka sngi Saitjaiñ kiba kynthup ïa ki masi, ki soh apple bad kiwei kiwei. Ïa kine ki mar la ïoh ban kem ha ka jingkhynra kaba la pynlong lang bad ki pulit ka Jylla hajan ki jaka khappud.
La ïathuh ba ha ka jingkhynra, ka kynhun ka la lap ïa bun ki masi kiba teh ha ki tynrai dieng ha kylleng ki jaka.
Ki shipai ki la ïoh khubor ruh ïa ka jingdon ki nongkhaïi tuh ïa u soh na khappud bad mar-mar ki la pynlong ïa ka jingkhynra ha kawei ka khlaw ha khappud bad ïoh ban kurup ïa bun synduk ki soh apple ba la buhrieh hapoh ka khlaw, kiba thmu ban khaïi sha Bangladesh.
Ïa kine ki mar ba la ïoh kurup bad ruh ïa ki masi, la aiti noh sha ki pulit bad sha ka tnat Custom ba kin leh ïa kaba donkam.
