Nongstoiñ, Nohprah 22
Ka jingpyntrei ïa ka surok Nongstoiñ-Rambrai la i kumba kan sa dep noh. Kane ka la pynlong shisha ka jingsuk ïa ka leit ka wan jong ki paidbah ka thaiñ ha kaba bun snem mynta ki la mad ïa ki jingeh namar ka jingbym ïoh ïa ka surok kaba bha.
Haba kren halor kane ka surok, uwei na ki ‘riew rangbah jong ka thaiñ Rambrai, Bah Iskarlan Nongsiej u la ong, “Nga pynpaw ïa ka jingsngewkmen ban ïohi ba ka Sorkar Jylla ka la phai khmat ïa ka roi ka par ha ka thaiñ Rambrai, bad kumba long mynta la ïohi ba ka surok na Nongstoiñ-Rambrai sa kum ban dep hynrei kaba kham sngewsih khyndiat ka long ba ki dang don ki bynta ha Lawdihbah ba ka don ka jingdkoh ïa ka ïaid ka ïeng jong ki paidbah namar ym pat lah ban pyndep katkum ba la mang ha ka por kaba biang bad haduh mynta ym pat ithuh ithaw bad kane ka la pynsohsat ïa ki paidbah ha ka ïaid ka ïeng”.
U Bah Iskarlan u la ong ruh ba ka Sorkar ka la dei ban phai khmat ban leh noh kham kloi ïa ka phase II namar lada don tang kane ka phase I, ka shu kut tang ha khlaw kam shym la pynïasoh (connection) hangno-hangno ruh.
Shuh shuh u la ong ruh ba kum uwei na ki ‘riew rangbah jong ka dong ka thaiñ, u la kyntu ïa ka Sorkar ban leh noh kloi ïa ka phase II ban pynpoi noh ïa kane ka surok bah katkum kaba dei hok ban pynïasoh bad ka Assam khnang ban long ka bit ka biang ïa ki paidbah bad ka thaiñ hi baroh kawei.
Haba kren pat halor ki lynti ki syngkieñ ha ka thaiñ Rambrai, u Bah Iskarlan u la ong ba ka thaiñ Rambrai naduh ki phew snem kiba mynshuwa ka la shu shah iehnoh shrah bad shah leh klet.
“Ngi long khlaw ngi long shrah ha manla ki jaka jong ka dong ka thaiñ Rambrai bad lada ngi phai ha ka liang ka thaiñ Mawdoh, Umïong ruh ym don surok, ngi phai sha ka liang ka Kynrin ruh ym don surok, sha ki thaiñ Mawkhiat ruh ym don surok, sha ki thaiñ Domshohksoin ym don surok, ha ki thaiñ Mawmylluh ruh ym don surok, Phudumbah bad ha baroh ki liang,” u la ong
U Bah Iskarlan u la pynpaw da kaba ong ruh “Kum uwei na ki ‘riew rangbah nga sngew ban ong ba lada ka Sorkar kan peit khmat lem ïa ka thaiñ Rambrai ka la don kam ban don noh kawei ka sub division jong ka tnat ba dei peit kumno ban phah ïa ki jingtyrwa ban ïoh ïa ki surok ha ki shnong bapher bapher kiba don ha ka dong ka thaiñ hi baroh kawei”.
