Jowai, Nohprah 22
Ka Prasar Bharati, ka Public Service Broadcaster jong ka Ri India, Akashvani-Jowai, ha ka 21 tarik Nohprah ka la ïoh ban rakhe ïa ka lyngkhuh snem kaba 30 naduh ba ka la sdang ïa ka jingai jingshakri ba kyrpang ha kine 29 tylli ki snem ba la leit noh hapoh Rilum Jaiñtia.
Ha kane ka prokram ba la pynlong hapoh Kiang Nangbah Government College Auditorium Hall, Jowai la ïadonlang ruh u Deputy Commissioner, West Jaiñtia Hills District, u Bah BS Sohliya kum u kongsan nalor u Additional Director General (A&BO) CO, Akashvani NEZ Akashvani & Doordarshan u Ashish Bhatnagar, ki heh na ki tnat Sorkar, ki dkhot na ka Akashvani Jowai nalor kiwei kiwei.
Ha ka jingkren kum u kongsan, u Bah Sohliya u la pynkynmaw ïa ki sngi ba la phah ïa kawei ka jingkyrpad jingrwai lyngba ka ‘postcard’ bad nangta la pule kyrpang ïa u nongpdiang. U la ban jur ïa ka jingdonkam jong ka FM radio ha ka ban ai ïa ki jingtip kiba kordor, khamtam na ka bynta ka jingmyntoi jong ki nongrep.
U Bah Sohliya u la pynkut da kaba pynpaw ïa ka jingdonkam jong ka pyrthei baroh kawei ïa ka jingpynbyrngia ha ki rukom bapher bapher, kata la ka long lyngba ki jingrwai, ki dur-khih, ne kano kano ka rukom ka ban pynsngewthuh.
La pynshongkun shuh shuh ïa kane ka prokram da ka jingpyni ïa ka durkhih lyngkot ïa ka khana-pateng jong ka Akashvani Jowai, ha kaba u Deputy Director (E) Cluster Head, u Bah Hamarlin Diengdoh u la ai ïa ka jingkren pdiang bad pynbud da ki jingrwai na ki nongtrei jong ka Akashvani, Jowai.
La pynkut ïa kane ka jingrakhe da ki jingshad jingrwai Khristmas ba la ïashim bynta da ka Lyngkitbait Lyngdoh bad ka kynhun bad bud da ka jingshad tynrai Jaintia na ka Chanhun Laloo bad ka kynhun. Hadien la bteng da ki jingrwai tynrai nalor ki jingrwai Hindi bad kiwei pat ki jingpynbyrngia.
