Jowai, Nohprah 21
Haduh 242 ngut ki khynnah skul hapoh ka Amlarem Sub-Division, West Jaiñtia Hills District, ki la ïoh pdiang ïa ka khusnam hadien ba ki la leh bha ha ka 1st War Jaiñtia Scholarship Examination 2024 ba la pynbeit da ka War Jaiñtia Student’s Union (WJSU) ryngkat ka jingïatreilang bad ka Amlari Model UP School.
Ïa ka khusnam sha ki khynnah skul la sam da u Adviser ka tnat pule puthi ka Sorkar Jylla bad MLA barim ka Mawsynram Bah HM Shangpliang, ha ka jingdonlang u MLA barim ka Amlarem Bah Stephanson Mukhim, u Block Development Officer (BDO), Amlarem Bah GLC Mylliem, nalor kiwei kiwei ha ka jingïalang kaba la long ha Enowell Hall, Amlarem ha ka 21 tarik Nohprah.
U General Secretary WJSU, samla Everest Langstang, u la ïathuh ba ïa ka Scholarship Examination la pynlong ha ka 14 tarik Nohprah ha ki 14 tylli ki eksam centre ha baroh kawei ka Amlarem Sub Division. La don 750 ngut ki khynnah kiba ïakhun ïa kane ka eksam bad napdeng kine, 242 ngut dei kiba la poi sha ka thong.
Nalorkata, napdeng kine 242 ngut ki khynnah la jied ïa ki Top-10, Top 20 bad General. Kiba wan ha ka kyrdan Top-10 ki la ïoh pdiang ïa ka song pisa kaba T.4000/, ba ar T.2500/. Ki khynnah kiba wan ha ka thup Top-20 ki la ïoh pdiang ïa ka song pisa kaba mar T.1500/-, katba General mar T.1000/- ryngkat ka syrnod. Ka Scholarship kaba la sam baroh ka long T.3,12,500 (Lai lak khatar hajar sanspah tyngka).
U Bah HM Shangpliang ha ka jingkren, u la baroh ïa ka WJSU kaba la khie im na ka jingsangeh treikam bad ïoh mynsiem biang ban trei na ka bynta ka bha ka miat ka imlang sahlang bad u paidbah ka thaiñ Amlarem Sub Division, bad bynrap ba ka long kaba donkam ïa ki seng kiba kum kine ban mih shakhmat ban kit ïa ka lyngkor jong ka jaidbynriew.
U Bah Shangpliang u la ban jur ïa ka jingdonkam kiba kum kine ki jait eksam khnang ba ki khynnah kin tip kaei ka pyrthei sawdong jong ki namar bunsien hi ki khynnah ki ju pule lyndet ïa ki lynnong kot bad ynda la kylli jingkylli shabar ka lynnong kim lah ban jubab.
Katkum ka jinglap jingshem ka jong u, u la ong ba ka jingeh ka long ba ynda ki khynnah ki la pass ïa ka klas-10, ka don ka jingdawa na ïing na sem ba ki dei ban wad kam wad jam noh bad aplai ïa ki kam hapoh DSC bad ynda ki la shong ïa ka eksam kim lah ban jubab ïa ki ‘General Knowledge Question’ bad kane ka dei ka jingduhnong kaba khraw tam.
U la pyntip ruh ha u snem ban wan na ka liang ka Sorkar Jylla ka la wanrah ïa ka sobjek Social Science ka ban pynbun shuh shuh ïa ki lynnong kot khnang ban ïarap ïa ki khynnah ban tip shuh shuh ïa ka General Knowledge.
Ka jingthmu jong ka WJSU ban pynlong ïa ka Scholarship Examination ka long ban pynmlien ïa ki khynnah naduh dangrit ba kin myllen ïa kiba kum kine ki jait Competitive Exam khnang ba ynda ki la heh kyrdan kin myllen bad jop ha ki jingpule jong ki, nalorkata ruh la khmih lynti ba lyngba ka jingpynlong ïa kum kine ki Competitive Exam ka thaiñ War Jaiñtia kan sa lah ban sei ïa shibun ki ophisar kum ki IAS, IPS, MCS bad MPS ha ki sngi ki snem ban wan.
U Everest Langstang u la ai khublei ïa baroh kiba don bynta naduh ki bor shnong, ki nongpynïaid skul bad kyrpang ïa ka ICFAI University, ka MIT University, ka Star Cement, kiba la kyrshan pisa ha ki rukom bapher bapher bad pynlong ïa kane ka prokram kaba jop.
Ïa ka jingïalang la pynphuh-pynphieng da ki jingrwai jingshad ha ka jingïadonlang ki Principal, ki nonghikai, ki kmie ki kpa, ki khynnah skul, ki ‘riew rangbah ka thaiñ bad kiwei kiwei.
