Shillong, Nohprah 29
Khnang ban tehlakam ïa ka jingdon kiba leh kulmar ha ka sngi rakhe snem thymmai bad kiba buaid ha ka por ba ñiah kali, ki bor pahara kin pynkhlaiñ ka jingpyrkhing ha kane ka nongbah bad ha kiwei ki jaka ha kine ki sngi.
Ha nongbah Shillong, ka tnat pulit ka la maham bad ha kajuh ka por ka buh jingkyntu ïa ki nongshong shnong ban long kiba adkar haba lehkmen ha ka miet pdiang ïa u snem thymmai.
Ka tnat pulit ka la kyntu ruh ïa ki nongshong shnong ban kiar na kaba ñiah kali ynda la dih kyiad bad lada dih kyiad dei ban don da uwei pat uba ñiah kali u bym dih.
Kin don ki jingpyrkhing bad peitngor da ki bor pahara ha kylleng ki jaka ban tehlakam ïa ki briew kiba thmu ban pynmih jingkulmar haba rakhe snem thymmai.
Lah ban kdew ba ha ki snem ba la leit, ki ju don ki briew kiba pynkulmar khamtam haba la shongshit ka jinglehkmen ynda la shoh khawiang la ka dei ha ki jaka paidbah ne lynti-syngkieñ bad ki ju kren da ki ‘tien sih ‘tien sang khlem tip shuh ïa ka akor burom para briew.
Ki ju don ruh ki jingjia ïashoh ïadat ha kum kane ka sngi lehkmen.
Kumta ki pulit ki la maham lypa ba kiba leh pyrshah bad pynkheiñ aiñ kin ngat ha ki kyndon jong ka aiñ.
