Shillong, Nohprah 29
U President ka seng ki nongrep ka thaiñ Mawsynram, Bah Odas Pdahkasiej, u la pyntip ba la khot ïa ka jingïalang jong ki nongrep ka thaiñ ban ïakren halor ka jinghiar dor jong ki marrep kaba la ktah shi katdei eh ïa ki nongrep.
U Bah Odas u la ong ba la pyntip ïa ki nongrep ba ka jingïalang kan long ha ophis ka seng ha Dongrum Mawsynram ha ka 4 tarik Kyllalyngkot, 2025 ha ka por 11.00 baje mynstep, kumta la lyntu ban mih marwei shi ïing ban ïa poi ha katei ka jingïalang namar ka ktah ïa ki nongrep.
Ki nongrep ka thaiñ Mawsynram, ki rep ïa u ‘latyrpad, synsar, sohniamtra, kwai, tympew, sohmrit khlaw. Kine ki long tang katto katne ki marrep hynrei ki don kiwei kiwei ruh ki jingrep kaba ki paidbah ka thaiñ Mawsynram ki rep.
Ka jingkhot ïa kane ka jingïalang ka long ban ïamir jingmut kumno ban wad ïa ki lat ki lynti ban pynïoh ïa ka ïew kaba biang ha kaba ïadei bad ka jingdie ïa ki marrep khnang ba ki nongrep kin kham ïoh ïa ka dor kaba biang, kumba ka long mynta ka jinghiar dor ki marrep ka la ktah ïa ki nongrep.
