Tura, Nohprah 29
Ki nongtrei Anganwadi hapoh ka lama jong ka All Garo Hills Anganwadi Workers and Helpers Association (AGHAWHA) ki la thoh sha u Myntri Rangbah ka Jylla, u Conrad Sangma halor ki mat ba kongsan kiba ktah ïa ka bha ka miat bad ka jinglong-jingman ha ka trei ka ktah jong ki.
Ki nongtrei ki la kdew ruh ïa ka jingthoh ba la phah kham shuwa – ha ka 2 tarik Jylliew, 2023 haba ïadei bad ka jingpynkiew kyrdan ïa ki nongtrei Anganwadi ‘Senior Graduate’, ka jingthung kam kontrak ïa ki ‘Supervisor’ kynthei bad ka jingdawa ban phai khmat nyngkong shuwa sha ki nongtrei Anganwadi ‘Senior Graduate’ (kiba don ha ka kam) ha ka liang ki jingpynkiew kyrdan.
“Kine ki jingeh ki la wanrah ïa ka jingbym sngewsuk kaba khraw hapdeng ki nongtrei bad ngi kyrpad ïa ka jingtuklar jong phi ban shimkhia ïa ki ha ka por kaba biang bad ha ka rukom kaba paka,” ong ka President, ka Monika D. Sangma.
Ka mat banyngkong eh kaba la pynpaw ka long ba ïa ki kyndon na bynta ban kyntiew kyrdan ïa ki nongtrei Anganwadi ‘Senior Graduate’ ym shym la pyntreikam ha ka por kaba biang, ha kaba ki la ong bad kane ka la wanrah jingeh shi kat dei ïa ki nongtrei kiba la shakri la bun-bun snem mynta.
“Ïa kane ka jingthoh la pynmih da ka jingthmu ban kyntiew ïa ka jingkyrmen ha ka kam bad ban ithuh ïa ka jingnoh synñiang kaba kordor jong ki nongtrei Anganwadi ‘Senior Graduate’. Kine ki nongtrei, ryngkat ka jingpule ba ki la pyndep bad ki snem ha ka jingshakri jong ki, ki la pyni ïa ka jingaiti kaba kyrpang ha ki kam jong ki. Hynrei wat hapdeng ki jingbthah kiba shai kiba la kdew ha ka jingthoh, ka la don ka jingbym lah ban pyntikna ha ka ban kyntiew kyrdan ïa ki nongtrei kiba dei hok hapoh ka por ba la buh,” ong ka jingujor.
Ki nongtrei ki la pynpaw ruh ka jingsngewkhia haba ïadei bad ka jingthung kam kontrak ïa ki ‘Supervisor’ kynthei halor ka jinglong shai ha ka jingthung kam.
“Ka jingbym don ki kyndon kiba shai na ka bynta ban thung kam ka la pynmih ïa ka jingsngew bym hok hapdeng ki nongtrei Anganwadi kiba la don lypa ha ka kam. Bun na ki, ki ngeit ba ka jingshakri ba bun snem jong ki bad jingshemphang ha ka kam, dei ban pynleit jingmut haba pyrkhat ïa ki kyrtong na bynta ki kam ‘Supervisor’. Ha jaka kata, ka rukom thung kam kontrak ba mynta ïa ki ‘Supervisor’ , khlem ka rukom jied kaba shai, ka la wanrah ïa ki jingsngew ba shah kyntait bad ka jingbym ïaryngkat hapoh ka kynhun ba ïatreilang. Ka jinglong-jingman ka nang jur ruh namar ka jingbym don ka jingshngaiñ ha ka kam,” ki la bynrap.
Ka seng ka la dawa ruh ban phai khmat nyngkong shuwa sha ki nongtrei Anganwadi ‘Senior Graduate’ kiba don ha ka kam ha ka liang ki jingkiew kyrdan bad ki jingthung kam.
“Ka jingdawa ban phai khmat shuwa nyngkong ka long halor ka jingngeit ba ki long kiba la pynkhreh bha ban sngewthuh ïa ki jingïapher jong ka rukom treikam ka Anganwadi bad ki jingdonkam jong ka imlang-sahlang,” la pynsngew ka Monika.
Ki nongtrei ki la pynsngew ruh halor ka jingdonkam ban ïanujor ïa ka jinglong-jingman jong ki nongtrei Anganwadi ha kiwei pat ki Jylla – kaba ki sngew ba kan pyni ïa kito kiba ha Meghalaya kiba ïakynduh jingeh ha ka liang ka jingïaid shakhmat jong ka kam, ka jingithuh, bad ka jingshngaiñ ha ka kam.
Na ka liang ki nongtrei ki la kyntu ruh ïa u Myntri Rangbah ban peit bniah ïa ki jingeh kiba ki mad kumjuh ban pynbeit noh kloi ïa kine kijuh.
