Shillong, Nohprah 29
Ki nongkyrshan ka BJP na ka 17 Malki-Laitumkhrah Konstitwensi ki la rai ban pynïeng da u samla Kynsaibor Lyngdoh uba shong ba sah ha Kharmalki uba dei ruh u dkhot ka BJP bad uba bat ruh ïa ka kam Secretary ha ka East Shillong Mandal kum u kyrtong ka seng ha ka ilekshon MDC ban wan.
Ha ka jingïakynduh jong katto-katne ki nongkitkam ka seng kaba la long ha ka 28 Nohprah ha jaka treikam ka seng ha Laitumkhrah, la rai da kawei ka jingmut ban trei borbah na ka bynta u samla Kynsaibor Lyngdoh.
Wat hapdeng ki jingeh kiba bun khamtam ka jingbym don shu ka kmie bad u kpa, u samla Kynsaibor u la pyndep ïa ka ‘base module course’ na skulbah NERIST ha Arunachal Pradesh da ka jingkyrshan lang ki shipara jong u. Haba ai jingkren u samla Kynsaibor u la ong ba u don ka jingsngewkhia halor ka jinglong jingman hapoh ka KHADC bad u la ong ba ka por ka la ih ba ki paidbah ka jylla kin phai khmat noh sha ka BJP namar ba ka bat ïa ka synshar-khadar hapoh ka ri bad naduh ba la synshar ka BJP ka ri ka la ïohi shibun ki jingkylla bad khamtam eh ka jinglah jong u Myntri Rangbahduh u Narendra Modi ban wanrah shibun ki lad ban pynkiew ïa ka ri bad khamtam eh ïa ki jaidbynriew riewlum. U la ong ba ha jylla Mizoram ar tylli ki Autonomous District Council la synshar da ka BJP bad ka paw ba ki paid riewlum ki pdiang ïa ka BJP.
Khlem pep lada ki paidbah ki ailad ïa ki kyrtong ka BJP ban wan ha ka bor ha KHADC bad JHADC kan wanrah shibun bah ki jingmyntoi namar ka BJP ka synshar ha Delhi bad naduh ka mang tyngka haduh ban pynrung ïa ki skim kiba heh sha ki council ka shong eh ka jingïadei bad ka sorkar pdeng.
U samla Kynsaibor u la kynduh ïa ki nongïalam bahalor jong ka seng bad un sa thep ïa ka jingtyrwa jong u sha u District President jong ka Shillong City kumba la bthah da ka seng. U samla Kynsaibor, 29 snem, u don ka jingkyrmen kaba skhem ban ïoh kheit ïa u soh jong ka jingjop hadien ba u la ïoh ban ïakynduh ïa bun ngut ki paid nongthep vote ka Malki-Laitumkhrah konstitwensi bad u la pynkhreh ban leit mih sha manla iwei pa iwei i thliew ïing ka konstitwensi ban pynshai halor ki nongrim ba u ïeng bad ki jingthmu ba u don na ka bynta ki paidbah ka jylla.
