Nongpoh, Nohprah 29
Ka dei ka sngi ka ban sah kynmaw ïa ki paidbah nongshong shnong jong ka Khlieh Umtrew kaba hap ha Mawhati Konstitwensi, hadien ba u MLA ka thaiñ, Bah Charles Marngar ha ka sngi Thohdieng ka taïew, u la leit ban buh mawnongrim na ka bynta ban shna bad siang rong ïa ka surok kaba pynïasoh na ka surok Umsning-Mawhati sha Khlieh Umtrew ha ka jingïalang kaba la pynlong ha madan jong ka Government LP School, Khlieh Umtrew.
Kane ka surok kaba la mang tyngka na ka State Road Scheme ha ka jinglut kaba T.4 klur tam bad kaba don ïa ka jingjngai kaba 4.5 kilometer, ka dei kaba kum ki paidbah nongshong shnong ki la ap khmih lynti bad phohsniew mynta la palat 58 snem tam.
Haba kren ha kane ka sngi, u Bah Charles u la pynpaw ïa ka jingkmen ba u la ïoh ban buh mawnongrim na ka bynta ban sdang pyntrei noh ïa kane ka surok kaba la ieh khongreng bad jot mynta da ki bun bun snem bad pynpaw ruh ba kum u nongmihkhmat lane u kpa jong ka thaiñ, um lah ban shu peit tang da ki khmat haba ki khun ki jynjar.
U la ïathuh ba kine ki jingkyrkhu ki wan dei lyngba ka jingpynïasoh ka jong u bad ka seng National Peoples’ Party (NPP) bad pynpaw ruh ba lada u dang ïai don sah ha ka liang pyrshah, lehse kine ki kam pynroi kin nym urlong satia kumba u thrang bad angnud ban pynurlong ïa ki jingdonkam jong ki paidbah, khamtam kumba ka Mawhati Konstitwensi hi ka dei kaba dang sahdien ha kiba bun ki liang bad ai ruh ka jingkhublei kaba kyrpang ïa ka Sorkar MDA hapoh ka jingïalam u Conrad K Sangma kum u Myntri Rangbah bad u Bah Prestone Tynsong kum u Symbud Myntri Rangbah.
U Bah Charles u la pyntip ruh ba ki dang bun ki surok ki ban sa dang pyntrei noh shen kiba kynthup naduh ka surok Umtra, ka surok Umkra, ka surok Mawrong, ka surok Pamlatar, ka surok Lymphuid, ka surok Mawlasnai sha Kdoh Hati, ka surok Nongjri-Raid Mawbuh bad shibun kiwei kiwei de ki surok kiba la sahteng mynta da ki phew phew snem bad ruh ban pyndep noh ïa ka surok na Sonidan sha Umsiang.
Sa kawei de ka kam pynroi kaba kum ki paidbah ki la angnud la slem ka dei ka Mawhati C&RD Block. U MLA u la pyntip ba ïa kane ruh yn buh mawnongrim noh ha u bnai Kyllalyngkot jong u snem 2025 bad lyngba ka jingïoh ïa kane ka C&RD Block kan pynsuk, pynjan bad ai jingmyntoi shikatdei ïa ki paidbah nongshong shnong ka thaiñ kiba hap ban ïaid da ki lynti kiba jngai ban ïoh ïa ki skhim bad ki kam pynroi sha Umsning C&RD Block kumba long mynta baroh shi katta.
Halor ki jingkynthoh (comments) kiba bun ha ki durkhih YouTube, u Bah Charles u la kyntu ïa ki paidbah ba kim dei satia ban ngeit ne ban sngap da kaba ong kiba bun na kito ki nongkynthoh kiba ak ieid jaidbynriew kim dei satia na ka Mawhati Konstitwensi bad dei ban buh jingkylli ruh, hato kita kiba kam ieid jaidbynriew ki la leh aïu na ka bynta ka imlang ka sahlang?
Ha kane ka sngi, nalor u Bah Charles Marngar, la wan ban ïa don bynta ruh da u Raja Brahma, Additional Deputy Commissioner ka Ri Bhoi, u Bah W Wahlang, Rangbah Shnong ka Khlieh Umtrew nalor kiwei kiwei de ki ‘riew rangbah bad ki paidbah nongshong shnong.
