Jowai, Nohprah 29
U MP ka Rajya Sabha, Dr Wanweiroy Kharlukhi, u la kular ban synñiang T.10 lak na ka MP skhim jong u sha ka Dorbar Shnong Khimusniang kum ka dak ka jingai sngewbha dap 75 snem ka shnong Khimusniang.
Haba kren kum u kongsan haba pynkut ïa ka platinum jubilee ka dorbar shnong Khimusniang, u la ong ba haba pynkut ïa ka pali jong u kum u MP ha u 2025-26 u la pyrshang ban theh ïa ka skhim MP sha Rilum Jaintia khamtam ka shnong Jowai kaba u la heh la san.
“Kum ka dak ka jingkyrshan jong phi ïa nga, ngan ai T.10 lak na ka bynta ka community hall jong phi,” la ong u Dr. Wanweiroi.
U la kren ruh halor u Moosniang, da kaba ong ba um dei tang ka history jong ka shnong Khimusniang, hynrei jong ka jaidbynriew bad ka kolshor. “Naduh mynshuwa ki briew jong ngi ki dei kiba tbit ban oh dur ha ki maw ki dieng bad kane ka kdew ïa ka kolshor ka jong ngi,” la bynrap u Dr Kharlukhi.
U MLA Jowai, Ma Wailadmiki Shylla haba kren kum u symbud kongsan u la kular ban shna ïa ka surok sha Urkhla bad surok synod kum ka dak jingai sngewbha jubilee.
Ha kane ka sngi la sam ïa ki tiar sah kynmaw sha ki nongseng ka shnong bad la pyllait paidbah ruh ïa ka souvenir.
La nang pynphuh pynphieng ïa ka jingrakhe jubilee da ka jingshad jingrwai kaba la shimbynta ki khun ka shnong nalor ka prokram kaba la pynkhreh da ka seng samla.
