89.575 mitar tam ka madan mareh thep kam pulit ha 4th MLP Bn. Sohpian

Nongstoiñ K’Lyngkot 03

Ha ka 3 tarik u bnai Kyllalyngkot, 2025 ka Hynñiewtrep Youths’ Council (HYC), West Khasi Hills ka la leit ban buh ïa ka jingujor ha u Deputy Commissioner ka West Khasi Hills ban kyrpad thew bha ïa ka madan jong ka 4th MLP Bn. Shopian, Nongstoiñ kaba dei ka madan mareh thep kam pulit hadien ba ka HYC ka la ïoh ïa kiba bun ki jingujor na ki samla wad kam.

U samla Lumlang Kharsyiemlieh, President ka HYC haba kren sha ki lad pathai khubor hadien ka jingleit ïakynduh bad u Deputy Commissioner ka West Khasi Hills, u la ong ba katei ka madan mareh kiba thep kam pulit ha 4th MLP Bn. Sohpian, Nongstoiñ, katkum ka jingïathuh ki samla wad kam pulit ba ka 15 ‘Round’, mynta ka don 339.305 x 15 = 5089.575, ha ka jingshisha ka dei ban don 333.34 x 15 ‘Round’ = 5000 eiei, hynrei ka la tam da 89.575 mitar.

U la ong ruh ba ha ka jingleit ïakynduh ïa u DC, ka seng ka la kyrpad ban ïarap lem kham kloi namar katkum ba la paw, ka jingmareh kan sdang biang ha ka 6 tarik haduh 11 tarik Kyllalyngkot, 2025.

U samla Lumlang Kharsyiemlieh u la ong ruh ba ka HYC ka la ïoh jingujor la slem ïa kane ka bynta hynrei ka la wad bñiah bad ka la ïoh ïa ka jingujor kaba shai bha ha kaba katei ka madan ka tam kumba 89 mitar na ka 5km ne 5000 mitar kumba la mang bad halor kane ka bynta ka seng hi ka pynpaw ia ka jingsngewkhia ïa kane ka kam.

Shuh shuh u la ong ba ka seng da ka jingsngewkhia ïa kane ka kam, ka la thmu ban leit ïakynduh ïa Superintendent of Police ka West Khasi Hills hynrei namar ka jingbym don jong u, ka la leit ban ïakynduh noh ïa DC ban kloi ka kam.

U la ong ruh ba ka seng ka la pyrshang ban wad bniah ha kiwei ki distrik bad bun kiba ïoh ‘Excellent’ ha kane ka jingmareh bad ki don bun kiba poi beit 18 minit hynrei hangne ki duna eh kiba ïoh ‘Excellent’.

U la ïathuh ruh ba ha ka jingleit ïakynduh ïa u DC, u la kular ban shimkhia bad un phah sha Centre Recruitment Board ban pynshisha biang.