Shillong, K’Lyngkot 03
Ka Dorbar Shnong Mawsynram ka la ïeng beit ha ka nongrim ban ym shah mane blei hapoh ka Krem Mawjymbuiñ, hynrei katei ka krem yn shah tang ban rung ban mih na ka bynta kiba leit jngohkai.
Haba kren hadien ka jingïalang ba la khot da ka Deputy Commission-er ha ka Sngi Thohdieng, u Assistant Rangbah Shnong ka Mawsynram, Bah Hiamdor Rapsang, u la ïathuh ba ka Dorbar Shnong ka la pynpaw ba kam khang satia ïa ki briew ban leit jngohkai ïa ka krem Mawjymbuiñ, hynrei kan ym shah pat ban pynlong jaka mane blei.
“Ka Dorbar Shnong ka dei ka trai jong ka Krem Mawjymbuiñ bad naduh kaba sdang kam ju shah satia ban lehniam hapoh jong ka krem”, u la ong.
U la ong ba kam don satia ka jingkhang ïano-ïano ruh ban wan kai sha katei ka krem, hynrei kino-kino ki briew ne ki kynhun ba wan kai ki dei ban burom bad bud ïa ki kyndon jong ka Dorbar Shnong, kaba la mana ban lehniam hapoh ka krem bad ban pynkylla ïa ka krem kum ka mandir ne ka temple namar ka dei ka jaka jngohkai.
Haba kren halor ki jingjia ha ki snem ba la leit ha kaba ki briew ki la leit ban lehniam hapoh ka Krem Mawjymbuiñ, u Bah Rapsang u la ong ba ha ki snem ba la leit, ki la don ki briew kiba leit theh dud, thang dhup bad bret syntiew hapoh jong ka krem, kaba lam sha ka jingpynjaboh ïa ka krem bad ki jaka ba marjan, kaba la pynlong ïa ka Dorbar Shnong ka la hap thung ïa ki nongïarap ban peit ban ap namar ba ka shnong ka kwah ban tyngkai bad ïada ïa ka krem.
“Lada ki briew ki pynkheiñ ïa ki kyndon, ka Dorbar Shnong kan hap ban leh eiei kat kum ka lynti jong ka aiñ. Kane ka krem ka dei kaba plie ïa ki nongwan kai naduh ka por 9 baje mynstep haduh ka por 5 baje janmiet man la ka sngi”, u la ong.
Na ka liang ka Dorbar Shnong ka la pynpaw ka jingbym sngewtynnat ïa ka jingwan tuklar ka KSP ban don bynta lang ha ka jingïalang ba ka khot da ka Deputy Commissioner, hynrei hadien ba la kren pynsngewthuh ki la mynjur ban shong ha ka jingïalang.
“Kine ki briew ki kwah ïa ngi ban ai jingbit ba kin lehniam leh rukom, hynrei ngi la kyntait namar ka krem kam dei ka jaka ban mane blei. Ngi la kren shai ba ki lah ban wan hynrei ki hap ban bud ïa ki kyndon jong ka Dorbar Shnong”, la ïathuh u Bah Rapsang.
Ha kawei ka liang u la ong ba ka KSP ka la shah ïalam bakla ha kaba ïadei bad ka Krem Mawjymbuiñ.
“Ka KSP ka la shah ïalam bakla, namar ki don ki briew kiba pyrshang ban ïalam bakla da kaba ong ba ym shah satia ban mane blei hapoh kane ka krem. Ki KSP ki la kubur ïa kata”, u la ong.
Une u Nongïalam shnong u la ong ba na kylleng ki jaka ka India, ki briew ki la wan sha Krem Mawjymbuiñ, khamtam ha ki taïew ba kyrpang jong ki. Hynrei hadien ba ki ïohi ïa ki jingthoh bad ki kyndon ba ka Dorbar Shnong ka la buh, ki pynpaw ba ki la hun tang ba ki la ïoh ban wankai sha kane ka jaka.
U Bah Rapsang u la ïathuh ba ha ka jingïalang la shim rai ba kine ki kynrum-kynram kiba mih baroh ki dei tang ka jingïasngewthuh bakla, namar kam shym la don satia ka jingkhang ïa ki briew ba kin wankai sha Krem Mawjymbuiñ.
