Shillong, K’Lyngkot 03
Ka Parish U Khrist Jingshai Marbisu, kan sa rakhe ïa ka sngi jingpynkut ïa ka Jingdap 75 snem (Platinum Jubilee) jong ka jinglong Parish ha ka 5 tarik Kyllalyngkot, 2025, ka ban sdang da ka Mass Bakhuid ha ka por 10:30 baje mynstep ha kaba u Most Rev. Archbishop Victor Lyngdoh un sa long u Kongsan, ka ban bud sa ka Jingmane Sakramen bad tamasa lehkmen jubili ha ka por 01:00 baje janmiet.
Kum ka Parish, ha ka kyrteng jong u Rev. Fr. J. Shylla (Parish Priest) ha ryngkat ki paid ‘riewngeit ka Parish, ka khot ka wer sngewbha ïa baroh ki paid ‘riewngeit na baroh kawei ka Jylla – naduh Shillong, Nongstoiñ bad Jowai Diocese ba kynthup ruh naduh ki nongïalam Parish bad ki paid ‘riewngeit jong ki Parish bapher-bapher jong ka Jylla (Longkmie, Longkpa, Samla bad Hep barit) ban ïasnohkti lang, ban ïakmen lang bad ka Parish ha kane ka sngi.
Kum ka Parish, ka la pynkhreh ruh ïa ki jaka ïeng kali kiba biang ban suk ka leit ka wan. Halor kane, na ka bynta kiba wan na ka surok ba wan na sor Shillong kin leit beit sha Mawngap, kiba wan na ka surok Nongstoiñ Highway kin wan na Ladmawreng bad rung beit sha Mawngap, bad kiba wan na ka surok Mawkyrwat, South West Khasi Hills kin sa ïeng kali ha Mawngap Mawkharsiing, katba kito kiba wan na ka surok Sohïong barim kin wan beit sha Saitkhlieh, Mawngap Gate.
Kumta ka Parish ka kyrpad rit ruh ïa ki paid ‘riewngeit kiba wan sha kane ka sngi jinglehkmen ba lada ki lah, kin sngewbha ban teh ïa ki lama lieh ha ki kali ban suk ban pynithuh kumjuh ban pynrung ïa ki kali sha ki jaka ba dei.
Shuh shuh ka Parish ka kyrpad rit ïa ki paid ‘riewngeit kiba sah ha shnong Mawngap, Laitpynter bad Marbisu ba kin ym wanrah kali khnang ban pynsuk pynbiang ïa ki jaka ïeng kali.
