Shillong, K’lyngkot 03
U Superintendent of Police uba thymmai ka East Khasi Hills District, Bah Vivek Syiem uba la shimti ban peit ïa ki kam kum u khlieh jong ka District u la pynpaw ba ki jingeh kiba hakhmat eh kiba donkam ban phaikhmat ki long ka jingpynneh ïa ka suk ka saiñ, ka dheng kali kaba la ktah ïa ki nongshong shnong bad ka jingkhanglad ïa ki kam runar bad ka jinglap kloi ïa ki nongleh kam runar.
Haba ïakren bad u nongai khubor, u Bah Vivek uba dei uwei na ki heh pulit uba la ju don ban tem ïa ki jingkulmar bad ïakynad ha nongbah Shillong ha ki snem ba la leit noh u la ong ba ha kano-kano ka jaka ki jingeh ki don beit khamtam kat ka East Khasi Hills District kaba heh bad kaba dei lang ruh ka nongbah jong ka Jylla, hynrei u kyrmen ba lyngba ka jingïatreilang kum ka kynhun, yn sa lah ban weng ïa ki jingeh kiba lah ban don khamtam eh ban tehlakam ïa ki jingsniew.
U la ong ba ka long kaba donkam ban thawlad ban weng ïa ka jingeh kaba ki nongshong shnong ki mad namar ka dheng kali kaba la jur palat, nalor ka jingpynneh ïa ka suk ka saiñ ha ka nongbah bad ka district baroh kawei.
U la ong ruh ba ki kam runar ki la nang kynrei bad kane ka jingeh ka dei kaba donkam ban shim ki sienjam ban khanglad ïa ki kam runar bad donkam ban lap kloi ïa kito kiba donbynta ban leh ïa ki kam sniew kiba long ka jingpyntroiñ ïa ka suk ka saiñ hapoh ka shnong ka thaw ka imlang sahlang bad ka jylla baroh kawei.
U Bah Vivek uba la shimti kum u SP bathymmai ka East Khasi Hills District ha ka Sngi Palei, u la pan ruh ïa ka jingkyrshan bad jingïatreilang jong baroh khnang ban lah tehlakam ïa ki kam sniew.
