Na ka UCPF, ryngkang u kyrtong sha ka Congress ban ïakhun MDC ha Umroi

Nongpoh, K’Lyngkot 03

Katba ki sngi ki por sha ka ilekshon MDC ka la nang jan, uwei na ki nongïalam jong ka Umroi Constituency People’s Forum (UCPF), Bah M.D. Syiem, uba bat ïa ka kyrdan Working President, bad uba la pan ruh ïa ka tiket na ka Forum ban ïakhun na Umroi konstitwensi, ha ka Sngi Thohdieng u la mih syndet na ka Forum ban leit pynïasoh ïalade sha ka Congress ha ka jingïalang kaba la pynlong ha kawei na ki jaka ha ka shnong Umroi Umdohbyrthih.

Hadien ba la ïoh jingtip na ki nongïalam ka Ri-Bhoi District Congress Committee, na ka liang u nongthoh khubor ruh u la leit sha katei ka jingïalang.

Hynrei, hadien ba la poi ha katei ka jaka, na ka liang jong u Bah M.D. Syiem lem bad katto-katne ngut ki rangbah, ki la kyrpad sha ki nongïalam jong ka Congress ban ym shah ïa ki nongthoh khubor ban thoh khubor halor katei ka jingleit pynïasoh ka jong ki.

Ïa kane la pynpaw ruh da u Working President ka Meghalaya Pradesh Congress Committee (MPCC), Bah Pynshngaiñ N. Syiem ha ka por ba u la ïakynduh bad ki nongthoh khubor shwa katei ka prokram rung Congress jong u Bah M.D. Syiem.

Na ka liang u Bah Pynshngaiñ shwa ban sdang ka jingïalang, u la ong ha ki nongthoh khubor ba u Bah M.D. Syiem bad ka kynhun jong u kin pynïasoh sha ka Congress mynta ka sngi.

Hynrei hadien ka jingïalang, u Bah Pynshngaiñ u khlem treh shuh ban ïakren wat hadien ba u nongthoh khubor u la pyrshang ban ‘phone’ ïa u.

Ha kane ka jingïalang mynta ka sngi, la ïohi ïa ka jingwan ïadon bynta naduh u Bah Pynshngaiñ uba dei ruh u MDC ka Mawkhar-Pynthorumkhrah, u Bah M.G. Kharshanlor, President ka Ri-Bhoi District Congress Committee, u Bah Rocky A. Marweiñ, kyrtong MDC ka Congress na Umsning, u Bah Lawrence Nongrum, kyrtong MDC ka Congress na Nongpoh lem bad kiwei-kiwei ki nongïalam ka Congress nalor ki katto-katne ki dkhot ka UCPF ba la lam khmat da u Bah M.D. Syiem.

Ha kane ka sngi, na liang u Bah Pynshgnaiñ u la khot ïa ki nongthoh khubor bad pynshai ba kam pat long ban ai khubor namar na ka liang ki kynhun kiba wan pynïasoh ki la buh ka jingkyrpad.

Kum ban shu kdew, dang mynshem bnai, kata ha ka 9 tarik Nohprah 2024, ka UCPF ka la mih pyrthei ha Umroi konstitwensi hadien ka jingkhylliap lama noh ïa ka seng Trinamool Congress (TMC) ha Umroi bad ha kiwei pat ki bynta jong ka Jylla.

Na ka liang ki nongïalam ha katei ka jingïalang kaba u Bah M.D. Syiem u la ïadon ryngkat, ki la pynpaw ba ka UCPF ka dei ka seng kaba laitluid bad kan ïakhun shimet ha kane ka ilekshon MDC kumba la ai jingmut da ki paidbah nongkyrshan na kylleng ka konstitwensi.

Katkum ka tyllong khubor ba la ïoh lum mynta ka sngi, la ong ba ka Umroi konstitwensi ka la ïoh ban thaw khana biang sa shisien ha Jylla bad ha kane ka kynti u la don pat u kyrtong uba ïoh haduh ar tylli ki tiket ban ïakhun ïa ka ilekshon MDC lyngba u Bah M.D. Syiem, uba la rem teng ha ka ilekshon MDC ha u snem 2014 bad 2019, uba ki ong ba u dei uba la ïoh ïa ka tiket na ka UCPF bad Congress ban ïakhun ïa ka ilekshon MDC na Umroi konstitwensi.

Ki nongïalam ka UCPF, ki bym kwah ban pynpaw kyrteng, mynta ka sngi ki la pyntip ba na ka liang ka UCPF ka la dep ban khot ban wer ïa ki briew kiba kwah ban ïakhun na ka Forum ha kane ka ilekshon MDC ka ban sa wan. Haba la thep kyrteng ki la don kumba 4 ngut ki ban pan tiket, kiba kynthup naduh u MLA barim ka Umroi, Bah George B. Lyngdoh, Bah M.D. Syiem, Bah John Syiemïong bad Kong Ïaishah Rymbai.

Kitei ki nongïalam ki la phla ruh ba hadien ba na ka liang ki dkhot jong ka Election Committee ka UCPF ki la leit ban sngap ïa ka sur jong ki paidbah sha kylleng ki paidbah ka Umroi konstitwensi, ka sur kaba bun hi ka long ba ki paidbah ki dang shaniah bad kwah dik-dik ba u Bah George B. Lyngdoh un hap ban ïakhun hi. La ong ba kane ka la pynlong ïa u Bah M.D. Syiem ban kynnoh byrngem ïa ki dkhot ka Election Committee ba lada kim ai tiket ïa u, un pynjot beit ïa ka kynhun bad leit lypa ban pan tiket na ka Congress namar ka jingtieng ïoh duh tiket na ka UCPF.

Hadien katei ka jingbyrngem, kitei ki nongïalam ki la ïathuh ba u MLA barim ka Umroi konstitwensi, wat lada ki paidbah ki kwah bad thrang eh ba un ïakhun ruh, u hap ban kynran dien noh bad weng ïa la ka kyrteng ban ailad ïa u Bah M.D. Syiem ban ïoh ïa ka tiket ban ïakhun na ka UCPF kum shi bynta ban lait na kano-kano ka ïapait-ïapra bad ban ïatylli lang kawei.

Ki la ïathuh ruh ba hadien ba ka UCPF ka la dep ban ai tiket ïa u Bah M.D. Syiem, na ka liang ki nongïalam jong ka Congress, kiba une u rangbah u la dep ban pan tiket lypa, ki la wan ban ïakynduh bad pynbor ïa u ban ïakhun pat sa na ka Congress kat haduh ba ki la jop hi thiaw bad pynlong ïa u Bah M.D. Syiem ban leit pynïasoh ïalade sha ka Congress mynta ka sngi.

Kitei ki nongïalam ki la kynnoh ruh ba katto-katne na ki nongïalam ka UCPF kiba don bad u Bah M.D. Syiem ki la mynjur ban leit pynïasoh ïalade sha ka Congress khlem da shim lang ïa ka jingmynjur jong u Bah George B. Lyngdoh, MLA barim.

Ki la kynthoh ruh ba u Bah M.D. Syiem u dei u briew uba la don ka jingïatreilang sop-sop bad ka National People’s Party (NPP) naduh ka ilekshon MLA jong u snem 2023 bad bynrap ka jingïaid lait bad leh pyrshah ïa u Bah George B. Lyngdoh ka dei namar ba u Bah M.D. Syiem u la shah pyndonkam ha uwei ne ar ngut ki heh ka NPP bad Congress.

Haba ïoh ban ïakren bad u Bah M.D. Syiem mynta ka miet lyngba ka ‘phone’, u la len ba u la leit ban pynïasoh sha ka seng Congress.