Shillong, K’lyngkot 03
Ka bor pynïaid ka East Khasi Hills District ka la pynjari da ka kyndon 163 BNSS ha kaba la mana ban ïalum paidbah kum ka jingtehlakam ïoh mih kano-kano ka jingïakynad hadien ba la ïoh jingtip ba ka don ka jingïakajia hapdeng ki arliang mamla jong ka Balang Presbyterian ha ka shnong Ksehpyndeng kaba hap hapoh Thanat Mawryngkneng.
Ka jingpynjari ïa kane ka kyndon ka la wan lyngba ka hukum kaba la pynmih ha ka Sngi Thohdieng da ka majistor ka East Khasi Hills District ka Kong RM Kurbah kaba dei ka Deputy Commissioner jong ka District.
La ong ba ka kynhun kaba thymmai ka thmu ban pynbaptis thymmai ïa ki dkhot barim kiba ha katei ka shnong ha kane ka Sngi U Blei ban wan, bad ïa kane la pyrshah jur da kawei pat ka kynhun.
Kumta lada ailad ïa kane ka jingthmu ka lah ban jur ka jingïakynad kaba lah ruh ban mih pynban ka jingpynkheiñ bad pynduh ïa ka suk ka saiñ, namar kata ka la pynlong ïa ka majistor ban pynjari da ka kyndon 163 BNSS ha kaba la maham ban ïalum briew ha katei ka jaka ba don ka jingïakajia.
La maham ba kano-kano ka jingpynkheiñ ïa kane ka hukum, yn pynsaja katkum ka kyndon 223 jong ka aiñ BNS. Kane ka hukum kan treikam mardor naduh la pynmih bad kan neh ban treikam tad haduh ban da pynmih hukum da kumwei pat.
