Shillong, K’Lyngkot 03
Ka Kutumba Surakshya Parishad (KSP) kaba dei ka seng ki hindu na Assam, ka la pynpaw ba ka pdiang ban bud ïa ki kyndon (Standard Operating Procedure) jong ka Dorbar Shnong Mawsynram ha kaba ïadei bad ka jingleit sha krem Mawjymbuiñ.
Ka Deputy Commis-sioner jong ka East Khasi Hills, Kong R.M Kurbah kaba dei ruh ka Chairman jong District Level Committee (DLC), ha ka sngi Thohdieng ka la khot ïa ka jingïalang katkum ka jingbthah ka Kashari Meghalaya High Court, ban pynbeit ïa ka kam leit mane blei ki hindu hapoh ka krem Mawjymbuiñ. Ha kane ka jingïalang la wan ban ïashim bynta ruh da ki Nongïalam ka Kutumba Surakshya Parishad (KSP) na Assam, ki Nongïalam ka Dorbar Shnong Mawsynram bad ki ophisar jong ki tnat ba don bynta ha katei ka kam.
U President ka KSP, Satya Ranjan Borah u la ong ba ha ka jingïalang la kren shai ba kam don ka jingkhang ban leit mane blei hapoh krem Mawjymbuiñ, hynrei yn hap ban bud pat ïa ki kyndon, bad ka krem Mawjymbuiñ kan plie beit man la ka sngi ban leit jngohkai bad ban mane blei.
U la ong ba ha ka jingïakren, la pynbeit ruh ban leh kyrpang ha ki bnai ba la tip kum ka ‘Shravana’ kaba ki ‘riewngeit hindu ki lehniam kyrpang ïa u blei shiva, kaba ju long man la u snem ha ki aïom ba kut artat ka lyiur.
“Kam don satia ka jingkhang, baroh ki lah ban leit sha ka krem Mawjymbuiñ baroh 365 sngi naduh ka por 9 baje mynstep haduh ka por 5 baje janmiet. Ki hap ban don ki SOP, ngi pdiang ïa kita. Ki la ong ba kin pynkhreh kyrpang na ka bynta u bnai Shravana”, la ong u Borah.
“Kam don satia ka jingkhang ban leit mane, namar ban mane blei ka mut ba ngin leit ban shong ha katei ka krem, ngin buh jingduwai ha katei ka jaka kaba lah ban leh ha kano-kano ka jaka ruh”, la bynrap shuh shuh u Borah.
U Nongïalam ka KSP u la ong ba kumba ka long mynta kane ka mat ba ïadei bad ka krem Mawjymbuiñ ka la kut.
“Ngin peit kaei ka ban jia hadien ba ki la pynmih ïa ki jingpynbna. Ngi shaniah ha ki Nongïalam ka Meghalaya. Ngi shaniah ha ki bor pynïaid district bad ngin ap kaei ba kin leh ha kine ki khyndiat sngi, kata ka ban sa batai kumno ngin shim rai hadien”, u la ong.
Kum ban shu kdew, kane ka kynhun ki hindu ha u Nohprah 2024 ka la byrthen ban pakhang ïa ka surokbah ban rung sha Meghalaya lada ym plie ïa ka krem Mawjymbuiñ ban leit mane blei.
Haba kylli halor kane, u Borah u la kyntait da kaba ong ba kam don satia kano-kano ka jingbyrngem na ka kynhun ki hindu, hynrei don kiba la pynsngewthuh bakla ïa kane ka kam.
Halor kane ka jingkam jong ka KSP ba kam don ka jingkhang ban mane blei hapoh ka krem Mawjymbuiñ, na ka liang u Assistant Rangbah Shnong ka Mawsynram, Bah Hiamdor Rapsang u la ong ba kam don satia ha ka jingïakren ban shah mane blei hapoh krem Mawjymbuiñ.
U la ong ba ka krem Mawjymbuiñ kan long kumba ju long, ym shah ban mane blei ne ban lehniam ha katei ka jaka, hynrei ki briew ba na kano-kano ka jingngeit ki lah ban wan ha katei ka krem bad bud ïa ki kyndon ba ka dorbar shnong ka la buh.
“Phim lah ban thang dhup, phim lah ban bret syntiew, phim lah ban theh dud lane kino-kino ki dak ban pyni ba katei ka dei ka jaka mane blei”, la ong u Bah Rapsang.
