Shillong, K’Lyngkot 03
U Vice-Chancellor (VC) ka North Eastern Hill University (NEHU), Prof. Prabha Shankar Shukla sa shisien u la pynjlan biang ïa ka jingshim shuti jong u (earned leave) haduh ka 12 tarik u Kyllalyngkot, 2025.
Da kaba kdew ïa ki “juh ki jinglong-jingman” na ka bynta ka jingbym don jong u ha NEHU, u VC, ha ka ’email’ ba la phah sha u Registrar ka skulbah, u la kyrpad na bynta ka jingpynjlan ïa ka shuti jong u kum ka jingbteng ïa ka ’email’ kaba u la phah ha ka 1 tarik u Nohprah, 2024.
Ha ka ’email’, u Prof. Shukla u la kdew ba lada jia ba don kano-kano ka kam kyrkieh ha ka liang ka jingpule ne jingpynïaid kam, u Registrar u lah ban kynjoh sha u lyngba ka ‘phone’ ne ‘online’/’email’.
U Prof. Shukla u la kdew ruh ba u Professor uba rangbah tam ha ka kam, ne Pro Vice-Chancellor un khmih ïa ki kam ba na ka por sha ka por jong ka skulbah ha ka jingbym don jong u.
Kum ban shu kdew hangne ba ka shuti pynjlan jong u VC ka NEHU ka la kut noh ha ka 29 tarik u Nohprah mynshem snem.
Na ka liang ka komiti jong ar ngut ki dkhot ba la thaw da ka tnad pule-puthi ka Sorkar Pdeng, ka la pan ïa ka jingpynjlan por sa 15 sngi (ha ka 29 tarik Naiwieng, 2024) ban aiti ïa ki jinglap jong ka. Ka jingai pynjlan por ka la kut noh ha ka 13 tarik Nohprah, 2024.
“Haduh mynta, ym pat ïoh jingtip eiei na ka liang ki ophisar ka tnad la ki la dep ne em ban aiti ïa ka kaiphod,” ong ki tyllong khubor.
Kum ban shu kdew hangne, u VC u la don hapdeng ka jingshim shuti hadien ka jingïakhih na ka liang ki samla pule ha ryngkat ka jingkyrshan ki nonghikai bad nongtrei ka skulbah halor ki jingkynnoh pynïaid kam bakla jong u ha u Naiwieng mynshem snem.
Shuh shuh ki samla pule ki la pynlong ïa ka jingïakhih shah thngan ba khlem buh por kaba la neh jan lai taïew eiei.
Kham shuwa, u VC u la dep ban thoh sha ka tnad pule-puthi ka Sorkar Pdeng ban pan bor jingïada ïalade bad pyntip ruh ba un shimti biang ïa ka shuki VC ha ka 2 tarik Nohprah, 2024 hynrei hadien kane, u la pynjlan biang ïa ka shuti sha ka 13 tarik Nohprah, 2024. Kumjuh, u la pynjlan biang ïa ka jingshim shuti haduh ka 29 tarik Nohprah, 2024.
