Shillong, K’Lyngkot 03
Uwei u samla briew ba la tip kyrteng da u Deva Kharkongor (23 snem) u la shah dung da ka khanshi ha ka miet jong ka 1 tarik mynta u Kyllalyngkot.
Une u samla u la mynsaw jur hadien ba u la shah dung na ki bynta jong ka khmat bad la pynkit noh ïa u sha NEIGRIHMS, Shillong ban shah sumar.
La ïathuh ba kane ka jingjia ka la jia ha ka por 9:40 baje eiei mynmiet ha ka jaka Ghumti Parking Lot kaba don ha Cantonment Area, Shillong.
Na ka liang ka kmie jong u Deva, Kong Mera Kharkongor ka la leit ban ujor da ka ejahar ha Jhalupara Police Outpost halor kane ka jingjia, bad ha ka ejahar ka la jer kyrteng ïa uwei u briew ba la tip da u Saidin Ali.
Katkum khubor ba la ïoh la ïathuh ba u Saidin Ali u dei u briew uba la don dak sniew lypa bad uba la shah kem teng halor kine ki juh ki kam ha ki por ba la dep.
Na ka liang ki pulit ki la pynlong ïa ka jingtohkit halor kane ka jingjia, hynrei haduh mynta ym pat shym la ïoh kem satia ïa une u briew ba la shah jer kyrteng.
