Shillong, K’lyngkot 05
U Tymmenbasan S Kharkamni na ka Balang Presbyterian Ksehpyn-deng u la ïathuh ba ki don kumba 50 tylli ki longïing kiba thaw kynhun thymmai ban thaw Balang thymmai.
U Tbn. Kharkamni u la ïathuh ba kane ka kynhun ka la sdang ban thaw Balang thymmai bad ka la ïaid mynta la phra snem ha ka jingïalam jong uwei u Tymmenbasan.
U la ïathuh ba kane ka jingthaw kynhun balang hapoh ka Balang Presbyterian Ksehpyn-deng la dep pyntip sha ka Sohryngkham District bad sha ka Laitumkhrah Presbytery.
Shuh shuh u la kyntait ïa ka jingpynmih hukum ka Deputy Commissioner ka East Khasi Hills namar haduh mynta kam don ka huri-hura namar ki la pynlong beit ka jingleit jingïaseng man ka Sngi U Blei ha ïingmane.
U la ïathuh ba ka Balang Presbyterian Ksehpyndeng ka don palat 200 tylli ki ïing Khristan bad 6 ngut ki Tymmenbasan, katba ïa katei ka kynhun ba la thaw Balang thymmai la ïalam da uwei u Tymmenbasan.
U la pyntip ba kane ka kynhun Balang Presbyterian bathymmai ki la shna ïingmane ha jaka lajong namar kim ïoh ban shna ha jaka jong ka shnong namar kim shym la ïoh ka jingithuh na ka Dorbar Shnong bad na ka Balang.
Ha ka juh ka por u la pyntip ba ka Balang ka kloi ban ithuh kum ka Balang thymmai lada ki wan ban pynbeit da ka jingïasngewthuh jingmut.
