Shillong, K’lyngkot 05
Ki pulit ka nongbah Shillong ki la ïoh ban bat noh ïa ki saw ngut ki nong Bangladesh na Anjalee Petrol Pump kaba rim kiba la wan rung beaiñ khlem ki kot ki sla kiba biang.
Kane ka jingïoh bat ïa kine nong Bangladesh ka la long hadien ka jingïoh ïa ka jingtip kaba bniah ha kaba ki la pynlong ka jingtalasi kali ha ka jaka ba don ka petrol pump mynshwa ha Anjalee.
Kine saw ngut ki nong Bangladesh kiba la shah bat ki dei kiba la tip kyrteng kum u Akhtar Sheikh, ka Rupa Begum, Raju Ali bad u Taijul Islam. Kine baroh saw ngut ki la wan da kawei ka Tourist Taxi kaba don ïa u registration number ML05-X-6502 kaba la ñiah da u TN Sohshang, kine ki briew ki la rung beaiñ sha India lyngba ka shnong Nongjri ha East Khasi Hills District.
Ha ka jingtohkit kine ki nong Bangladesh ki la ïathuh ba ki la rung beaiñ sha Ri India da ka jingthmu ban leit sha Jammu & Kashmir. Ka jingïoh bat ïa ki nong Bangladesh kiba mut leit sha kiwei ki jylla ka Ri India ka la jia bun sien ha kane ka jylla Meghalaya.
