Jowai, K’lyngkot 05
U MP ka Rajya Sabha, Dr Wanweiroy Kharlukhi ha ka 4 tarik Kyllalyngkot u la buh mawnongrim na ka bynta ban tei pynheh ïa ka Community Hall (ïingdorbar) jong ka Dorbar Shnong Mynthong, Jowai.
Ha kane ka jingbuh mawnongrim, la synran ïa u MP da u MLA ka Jowai, Ma Wailadmiki Shylla, u MDC ka thaiñ Ma Lakhon Dkhar ha ka jingdonlang u BDO ka Thadlaskeiñ Block, Dr H Niang, u Dolloi ka Elaka Jowai Ma Puramon Kynjing, ki nongïalam bad nongkitkam shnong kumjuh ki nongshong shnong ha ka jingïalang kaba la long hapoh ka Community Hall.
Haba pynïaid ïa ka jingïalang, u Waheh shnong Mynthong, Ma Lamphrang Pohktai, u la ïathuh ba ïa ka Community Hall la tei naduh u snem 1993 lyngba ka jingïarap u MLA barim Prof. RC Laloo hynrei namar ba la nangroi ki nongshong shnong kumta ka Dorbar shnong ka la pyrkhat ban tei pynheh noh ïa ka.
U la ïathuh ba ïa ka jingtei pynheh la mang ha ka jinglut kaba 1 klur 90 lak tyngka bad kumba long mynta ka pisa na ka bynta ban sdang ïa ka jingtei ne Phase-1 ka long 23 lak tyngka lyngba ka jingsynñiang u MP bad MLA mar 10 lak tyngka kumjuh u MDC ka thaiñ shi lak tyngka ryngkat katto katne ka pisa shnong.
U Wailadmiki Shylla ha ka jingkren u pynpaw ka jingsngewkhia namar ka shnong Mynthong ka don ïa ka jingeh kaba hakhmat na ka jinglong jingman ka jaka khamtam ha ka aiom lyiur bad ïaroh ruh ïa ka jingïatreilang ki nongïalam shnong barim bad ba mynta ba wat hapdeng ki jingeh la lah ban pynlong ïa kane ka jaka kumba ka long mynta.
Haba kyntu ïa ki nongshong shnong ban kiar na ka jingsngew politik namar ka wanrah ka jingïajngai hapoh shnong poh thaw, u Wailadmiki Shylla u la ong, kane ka dei ka ïing paidbah, donkam ka jingïatreilang na baroh na ka bynta ban saiñdur ïa ka synshar khadar bad ban pyrkhat kumno ban kyntiew ïa ka roi ka par hapoh ka shnong ka thaw bad ka imlang sahlang bad ha kajuh ka por u la kyntu ban wanrah ka jingkhuid jingsuba hapoh ka shnong Jowai.
Haba ïadei bad ka jingtei pynheh ïa ka Community Hall, u MLA u la kyntu ïa ki nongïalam shnong ban ym duh jingkyrmen hynrei ban sdang ïa ka jingtei katba ki kot bor bad na ka liang jong u ruh u la kular ban thaw ki lad ki lynti ban pynïoh skhim ha shwa ban lut ka 23 lak tyngka.
U Dr Kharlukhi kum u briew uba la kha bad heh san ha Jowai bad ïoh ruh ka jingieid jingkyrshan jong ki paidbah ka Rilum Jaiñtia haduh ba u la poi ha kane ka kyrdan, u la ong ba ka jingsynñiang sha ki Dorbar Shnong ka Rilum Jaiñtia ka dei ka kamram jong u ban siew kylliang ïa ki paidbah bad lada um lah ban theh ki jingïarap u sngew ba u dei u briew uba khlem raiñ tam ha kane ka sla khyndew.
U la ong ba ha kaba kut ka pali jong u kum u MP, ka jingkwah jong u, ka long ba un ai bhah ai bynta mar khyndiat sha baroh ki shnong ka Jowai.
Kiwei kiba la ai jingkren ki long u Ma A Laloo uba dei u Chairman, Secretary bad Adviser barim ka Mynthong, ka jingrwai pdiang na Music Committee MSYAC, bad ïa ka jingïalang la pynwai da ki kyntien khublei na u D Lathong, Secretary Dorbar shnong Mynthong bad ka jingplie ïa u maw nongrim da u kongsan.
