Shillong, K’lyngkot 05
Ka rai jong ki paidbah ban phah ïakhun ïa u MDC ka Mawlai, Bah Teiborlang Pathaw ban ïakhun kum u kyrtong shimet kan buh ïa ka National People’s Party (NPP) ha ka jingeh ban ïoh kyrtong na Mawlai konstitwensi bad ki don ruh kiwei ki konstitwensi kiba ym don ki kyrtong.
Haba ïakren bad u Working President ka NPP Meghalaya Unit, Bah Hamletson Dohling halor ka jingkylla ha Mawlai konstiwensi ha kaba u Bah Pathaw u la iehnoh ïa ka NPP, u la ong ba haduh mynta la shu ïohi lyngba ki lad pathai khubor ïa kaei kaba jia ha Mawlai bad kum ka seng kam poi pyrkhat satia ba kan jia kumne namar ka por ka la dei artad sa ban pynbna biang ïa ka thup kyrteng jong ki kyrtong ha ka wat ba-ar.
“Ka long kaei-kaei kaba ngi khlem poi pyrkhat ba kan jia kumne ha Mawlai bad na ka liang ka seng, ngin sa ïakynduh ïa ki nongïalam jong NPP Mawlai Block ban ïoh jingshai ha kaba ïadei bad kane,” la ong u Bah Dohling, uba khlem sngew lah ban ngeit ba u Bah Pathaw un ieh ïa ka seng ha ka khyllipmat ka bym poi pyrkhat.
U la ong ba ka seng ka kwah ban sei kyrtong na Mawlai bad na ka liang ki nongïalam kin sa khot ïa ki nongkitkam jong ka Block kiba dang don bad ka seng.
U Bah Pathaw u dei uba la ïakhun ilekshon la bunsien naduh u snem 2013, bad u la jop kum u kyrtong shimet ha ka ilekshon MDC na Mawlai ha u snem 2019.
Hadien ba u la rung sha ka NPP, u Bah Pathaw u la shimti kum u President ka NPP Mawlai Block ha kaba u la ïakhun ruh kum u kyrtong ka NPP ha ka ilekshon MLA ha u snem 2023 hynrei u khlem poi sha ka thong.
U Bah Pathaw u la pynbna ha ka sngi Saitjaiñ ba u kloi ban pyndem ïalade ha ka mon ki paidbah nong Mawlai kiba phah ïa u ban ïakhun kum u kyrtong shimet da kaba iehnoh ïa ka NPP.
U la pynbna ïa kane ka rai hadien ba ki paidbah na kylleng ka Mawlai ki la wan sha ka jingïalang paidbah ha Mawlai Nonglum ha kaba ka sur jong kiba bun ka sawa ba u dei ban ïakhun kum u kyrtong khlem seng ha kane ka ilekshon MDC kaba mynta.
Haba kular ban sngap ïa ka sur bad jingangnud ki paidbah, u Bah Pathaw u la ong ba u kloi ban pyndem ha ka mon ki paidbah ban ïakhun kum u kyrtong shimet ha kaba u la bynrap da kaba ong, “ka bor ki paidbah ka long halor ïa ka seng”.
Kane ka rai jong u Bah Pathaw katkum ka mon jong kiba bun kiba lang ka la pynlong ruh ïa ki paidbah ban risa bad kmen ha katei ka jingïalang paidbah.
Kham katto katne bnai mynshwa, u Bah Pathaw u la dep pynpaw ka jingartatien ban ïakhun ïa ka ilekshon MDC namar ka don ka jingpyrkhat ha u ba lehse, ki paidbah kim jied ïa u wat haba u la ïakhun la bunsien ïa ka ilekshon MLA namarba kim pdiang ïa ki mat treikam (policy) kiba u don kiba u la dep pynsngew sha ki paidbah na ka bynta ban kyntiew ïa ka Mawlai
Hynrei ki paidbah na kylleng ka Mawlai konstiwensi kiba la poi sha ka jingïalang kaba la lum da ka Mawlai Social Service Organisation (MSSO) ha Mawlai Nonglum ha ka sngi Saitjaiñ, ki la pynpaw ïa ki jingpynsngew hakhmat u Bah Pathaw ba um dei ban kynran dien bad u dei ban ïakhun beit ïa ka ilekshon MDC mynta u snem.
Ki paidbah ki la dawa ba u Bah Pathaw haba u mih ban ïakhun, u dei ban ïakhun kum u kyrtong shimet namar ka sur jong ki paid nong Mawlai ka long ba kim mon ba un ïakhun na ka NPP, hynrei ki mon eh ïa u kum u briew uba shakri paidbah namar u don ruh ki mat treikam ban kyntiew ïa ka Mawlai bad uba pyrkhat na ka bynta ki samla, bad uba trei na ka bynta ka Mawlai ha kiba bun ki liang.
