Jowai, K’lyngkot 05
U President jong ka Voice of People Party (VPP), Bah Ardent M Basiawmoit uba dei ruh u MLA jong ka Nongkrem Konstitwensi, u la byrthen ba ka VPP kan leh da kaba tyngeh ïa kino-kino ki Dorbar Shnong ha Rilum Jaiñtia kiba ju mlien ban “rule” ne pynbor ïa ki nongshong shnong jong ki ban thep ‘vote’ ha uno-uno u kyrtong ba la jied da ka Dorbar Shnong.
Ka VPP ka ïeng halor ka nongrim ba ki nongthep ‘vote’ ki don ka hok ban jied ïa u ne ka kyrtong ba ki mon ym da ka jingshah pynbor bad jingshah pyntieng pynsmiej, ong u Bah Ardent haba kren ha ka jingïalang ïalap ilekshon na ka bynta ka kyrtong jong ka VPP na Mynsngat-Khanduli Konstitwensi ka Kong Darapbiang Mulieh ha madan Phutbol Khanduli ha ka Lah Sngi U Blei mynta ka taïew.
U la ong shuh shuh ba ka VPP kan sa thoh sha ka Sorkar Jylla ban pynthikna ba kan ym don kano-kano ka jingshah byrngem-byrsit na kano-kano ka Dorbar Shnong ïa ki nongshong shnong jong ki ha kane ka ilekshon sha ka ïingdorbar thawaiñ jong ka JHADC.
