Shillong, K’lyngkot 06
Ka Kynhun Myntri (Cabinet) jong ka Sorkar Jylla kan leit ban pynlong ïa ka jingïalang ba ar sngi sha Sohra, East Khasi Hills. Kane ka jingleit ka Kynhun Myntri kan long ha ka 10 & 11 tarik mynta u bnai.
Katkum ka tyllong khubor ba la ïoh la ïathuh ba ha kine ki ar sngi ka Sorkar kan pynlong ïa ka jingïalang jong ka Kynhun Myntri bad kan pynlong ruh ïa ki jingïalang bad ki tnat bapher-bapher ban ïakren ha kaba ïadei bad ki kam pynroi hapoh ka Jylla. La ïathuh ba ka jingjied ïa ka Sohra ban pynlong ïa ki jingïalang jong ka Sorkar ha ka jingsdang ïa u Snem Thymmai, ka long ban pynpyngngad jabieng shwa ban pynïaid shakhmat ïa ki kam bad ki rai ba la shim da ka Sorkar.
Ka jingthmu jong kane jingleit pynlong jingïalang ka long na ka bynta ban ailad ïa ki tnat Sorkar bapher-bapher ba kin ïaphylliew jingmut ïa ki jingduna, bad lyngba kane ka jingïalang yn lah ban wanrah ka jingïatreilang ban pynpoi sha ka thong ba ka Sorkar ka kwah ban trei.
Ha kane ka jingleit jong ka Sorkar, la buh hynriew tylli ki jingïamir jingmut da kaba pynleit jingmut ha la ki jong ki jong ki phang ban ïakren da ki tnat Sorkar.
Ki phang ba la buh ha kane ka jingïalang ki kynthup ïa ka thong 2032, ban pynbha bad kyntiew ïa ka jingïadei hapdeng ki nongshong shnong bad ka mei mariang, ka bha ka miat ki nongrep, ka bording, ban kyntiew ïa ki samla bad ban pynneh ïa ki um ki wah bad ki sawdong sawkun.
