Shillong, K’lyngkot 06
Hadien ba la pynbna ban ïakhun ïa ka ilekshon MDC kum u kyrtong shimet, u MDC ka Mawlai konstitwensi, Bah Teiborlang Pathaw ha ka sngi Nyngkong 6 tarik Kyllalyngkot u la iehnoh ïa ka kam executive member na ka executive committee ba ïalam da ka NPP.
U Bah Pathaw da ka jingsynran lang ki rangbah na Mawlai u la leit ban aiti ïa ka shithi iehnoh kam ha u Chief Executive Member (CEM) ka KHADC, Bah Pynïaid Sing Syiem ha kamra treikam jong u. Ha kane kajuh ka sngi u la aiti ruh ïa ka shithi ba u la weng syndon na ka jingkyrshan ïa ka executive committee.
Haba kren bad ki lad pathai khubor, u Bah Pathaw u la ong, “U paidbah u long halor ïa baroh, na ka liang jong nga, nga la shim ïa ka rai ha ka sngi Saitjaiñ ba ngan ïakhun noh kum u kyrtong shimet. Nga wan ban aiti ïa ka shithi iehnoh kam jong nga kum u EM bad nga la weng ruh ïalade na ka jingkyrshan ïa ka EC ban pyndep ïa kaei kaba nga la kular sha u paidbah ba ngan leh”.
Hadien ba u Bah Pathaw u la pynbna ban mih noh na ka seng National People’s Party (NPP) ban ïakhun biang ïa ka ilekshon MDC kum u kyrtong shimet, ki jingkynthoh kiba bun ki la mih ha ki social media ba ka dei tang ka buit ban jop ilekshon, hynrei hadien un sa rung biang sha ka NPP.
Haba kylli halor kane, u la pynpaw ba u paidbah u dei uba halor, ha kaba u la pynthikna ba lada u jop ïa ka ilekshon ruh un neh beit kum u MDC laitluid bad un kohnguh beit ïa kaei kaba u paidbah u rai, bad bynrap shuh shuh ba u paidbah uba pynshong bad uba pynïeng.
“Nadien nangne hi na ka liang ka jong nga, kano-kano ka bynta ba nga dei ban shim ïa ka rai lada nga poi sha ka thong ngan ieh beit ha ka rai jong u paidbah, ngan bud bad ngan kohnguh beit ïa kaei kaba u paidbah u ong”, la ong u Bah Pathaw. Ha kaba ïadei bad ka seng NPP ha Mawlai, u Bah Pathaw u la ïathuh ba u la dep phah ïa ka shithi iehnoh kam bad iehnoh ïa ka jinglong dkhot hapoh ka NPP, bad ïa kane ka shithi u la phah sha u President ka NPP Meghalaya unit, Bah Prestone Tynsong.
Ha ka shithi iehnoh na ka jinglong dkhot hapoh ka NPP, u Bah Pathaw u la pyntip ruh sha ki Nongïalam ka seng ba ïa ka NPP ha Mawlai la khylliap lama shisyndon.
“Nga pyntip ba nga la iehnoh na ka jinglong dkhot hapoh ka NPP bad ha kajuh ka por nga pyllait lut ïa baroh ki kam ba la pynkhamti ha nga hapoh ka seng. Nga kwah ruh ban pyntip ba ïa ka NPP Mawlai Block la pynwai syndon”, la pynpaw u Bah Pathaw ha ka shithi.
