Jowai, K’lyngkot 06
U President jong ka Voice of People Party (VPP), Bah Ardent M Basaiawmoit, u la ong ba la thaw ïa ki District Council ban ïada ïa ki riti synshar bad kolshor jong ki riewlum hadien ba la pynurlong ïa ka Sixth Schedule jong ka riti synshar jong ka Ri India da ka jingïakhun bad jingtrei shitom jong u Rev. J.J.M Nichols Roy.
Hynrei ka jylla ka dang donkam ïa ka iktiar kaba kham khlaiñ ban ïada ïa ka Jylla na ka jingpyntreikam jong kino-kino ki aiñ ba la mynjur da ka Sorkar India. Kumta u la ong ba ka VPP ka ïeng halor ka nongrim ban dawa pyntreikam ïa ka Article 371 jong ka riti synshar jong ka Ri India khnang ban ïada kyrpang ïa ka khyndew ka shyiap ka riti synshar bad kolshor jong ki nongshong shnong jong ka jylla kumba long ha Nagaland bad Mizoram.
U la ai nuksa ruh ba ki Naga haduh mynta-mynne ki dang ïohlad ban siat mrad namar ka jingpyntreikam jong ka Article 371 ha jylla Nagaland hynrei ha jylla Meghalaya ym shym la ïoh lad satia shuh mynta na ka jingpyntreikam ïa ka Wildlife Protection Act jong ka Sorkar Kmie.
Kiwei kiwei kiba la ai jingkren ha kane ka jingïalang ki long ka Kong Darapbiang Mulieh bad u kyrtong jong ka VPP na Modop Umladang u Chanbor Rymbai bad kumba 500 ngut ki nongshong shnong jong ka Khanduli ki la wan sngap ïa kane ka jingïalang.
