Tura, K’lyngkot 06
Ha kawei pat ka jingjia ba sngewsih kaba la jia hapdeng ka jingïatyngkhuh jong u briew bad u mrad, uwei u briew u la khlad noh ha ka step Lah Sngi U Blei, 6 tarik Kyllalyngkot ha ka shnong Kurung Saltop kaba hap hapoh Rongsai OP jong ka thanat Tikrikilla ha West Garo Hills.
Kane ka jingjia ka la jia hynne ka step ha ka por kumba 5 baje eiei ha kaba une uba la khlad noh ba la tip kyrteng kum u Harwit Marak (62 snem ka rta) u dang mih na la ïing ha kaba jia ryngkhat, u la ïakynduh ïa ka kynhun ki hati khlaw kaba dang ïaid lynti na katei ka jaka.
Utei u briew u la khlad ha shen na ka jingshah ïuh ha kitei ki hati khlaw. Katei ka shnong kaba la kdew hangne ka don hajan ka jaka ba ju ïaid lyngba ki hati – kaba ju sakhi ïa ka ïaid ka ïeng ba man ka por jong ki (hati) ha ki por bapher-bapher jong ka snem katkum ka jingdon jong ki jingbam.
