Jowai, K’lyngkot 05
Haduh mynta dei tang ka VPP kaba la sei kyrtong na baroh 58 tylli ki konstitwensi ha kane ilekshon sha ka ïingdorbar thawaiñ jong ka JHADC bad KHADC, ong u President ka Voice of People Party (VPP), Bah Ardent M Basiawmoit.
Ïa kane u la ong haba kren ha ka jingïalang na ka bynta ka kyrtong jong ka VPP na Mynsngat-Khanduli Konstitwensi ka Kong Darapbiang Mulieh ha madan Phutbol Khanduli ha ka Lah Sngi U Blei mynta ka taïew.
U la ong, ba ha kane ka ilekshon MDC kin bun bha ki MDC jong ki NPP ne UDP ki ban sa ïeng kum ki kyrtong shimet na ka daw ba ki tip ba u paidbah un ym pdiang shuh ïa ki ha ka seng ba ki don.
U Bah Ardent u la ong ba kin sa don ki kyrtong bula ne ki ‘dummy candidate’ kiba sa ïeng ha kane ka ilekshon MDC da ka jingthmu ban pynpra ïa ka ‘vote’ jong ki kyrtong ka VPP.
U la ong ruh ba ha kane ka ilekshon MDC ka jingïakhih ha baroh ki konstitwensi kan long hapdeng ka VPP bad kiwei pat ki seng kum ka UDP, NPP bad Congress lem bad ki kyrtong shimet.
U la ther tyngeh ïa ki seng saiñpyrthei bapher bapher kiba la synshar ïa ka Jylla Meghalaya ha ki 52 tylli ki snem kiba la leit halor ka jingbym lah jong ki ban pynbeit ïa ka jingïakajia khappud hapdeng ka Meghalaya bad ka Assam.
U la ong ba ki nongshong shnong jong ka jylla Meghalaya kin hap ban ïai mad ïa ki jingshah pyndik jingshah pynshitom ha ka Sorkar Assam na ka por sha ka por haduh mynta mynne.
U la ong ruh ba lada ka VPP kan wan ha ka bor kan pynbeit noh mardor ïa ka jingïakajia khappud bad ka jylla Assam bad kan wanrah ïa ki lad ki lynti ban ai jingshngaiñ ïa ki nongshong shnong jong ka jylla ha ki thaiñ khappud.
