Shillong, K’lyngkot 06
U President ka Meghalaya Pradesh Congress Committee (MPCC), Bah Vincent H Pala, u la pynpaw ba ka Sorkar ka dei ban kiar na ka jingshah liang tang sha kawei ka niam ha kaba ïadei bad jingngeit, bad kyntu ruh ban tyngkan ïa ka ktien ban ym ktah ïa ka niam.
Kane ka jingong u Bah Pala ka la mih hadien ba u Myntri ba khmih ïa ka tnat ka Pule-Dangle ka Jylla, Rakkam A Sangma u la pynsngew ba yn pynlong da ka jingïaseng Khristan ha ka sngi ba plie ïa ka skulbah ba nyngkong ka Jylla kaba la ainam ha ka kyrteng u Capt. Williamson Sangma.
U Bah Pala u la ong ba ka MPCC ka ïeng beit ha ka nongrim ban ym leh shiliang, da kaba kdup lang ïa baroh ki jait niam katkum ka hok ba la ai hapoh ka Riti Synshar jong ka ri, namar ka dei uwei na ki rishot ba la tei ïa ka synshar paidbah hapoh ka ri India ba baroh ki long kumjuh, khamtam ha ka jinglaitluid bad burom ïa baroh ki jait niam, la ka long ka niam Khristan, Hindu, Islam, Niamtre, Niam Khasi lane kiwei pat ki jingngeit na ka bynta ban don hapdeng ka shong suk.
Katkum ka jingong u Bah Pala, ka jingkren u Myntri dang shen ka paw ba ka don ka jingïashah tang sha kawei ka niam bad kane ka long pyrshah ïa ka Riti Synshar jong ka ri India kaba ai laitluid ban mane blei, bad ha kajuh ka por u la ong ba kane ka jingkren ka wanrah jingma ruh ban pynpait ïa ka imlang-sahlang.
U Nongïalam ka Congress uba dei u MP barim ka Jylla u la ong ba ka seng ka ngeit ha ka rukom pyrkhat kaba ong ‘Sarva Dharma Samabhava’ kaba mut burom kumjuh ïa baroh ki jait niam. Kumta u la kyntu ïa baroh ki Nongïalam, khlem da kheiñ ïa ka seng ba ki don ba ki dei ban don ka jingkitkhlieh haba ki kren lane leh ïa kano-kano.
U la ong shuh shuh ba ka jingkhlaiñ jong ka Jylla Meghalaya ka shong ha ka jingdon jong ka ïa bun jait ki jaidbynriew, ka jingbun ki jait niam kiba don ruh ïa ka hok ban ïoh burom kumjuh bad ïohlad lang kumjuh ha kino-kino ki kam.
U la ong ba ka Congress ka khot ïa ka Sorkar ban wanrah ka jingïatylli bad ka jingïaburom markylliang, ym ban pyndonkam da ki ktien lane ki kam kiba pynshit paidbah tang na ka bynta ban myntoi saiñpyrthei shipor, bad bynrap ba dei ban kiar shisyndon na kum kine ki jingkren.
